Кэскилбит кэнчээрилэрэ: оскуоланы бүтэрээччилэр ханнык идэни батыһалларый?
Саха сирин үрдүнэн үрдүк уонна орто анал үөрэх кыһаларыгар докумуоннары тутуу саҕаланна. Оскуоланы бүтэрээччилэр иннилэригэр – олохторун суолун быһаарар эппиэтинэстээх түгэн. Кэскиллэрин ханнык идэни кытта ситимнииллэрин, устудьуон олоҕуттан тугу күүтэллэрин ыйыталастыбыт.
«Уһуйааччыларбыттан дириҥ билиини ылыам диэн эрэнэбин»
Валентина Афанасьева, Дьокуускай куорат 7№-дээх оскуолатын выпускнига:
– Мин Дьокуускайдааҕы медицинскэй колледжка «Эмтиир дьыала» эбэтэр «Акушерскай дьыала» идэлэригэр туттарсарга былааннанабын. Орто анал үөрэххэ быраактыкаҕа улахан болҕомто ууралларыттан, кылгас кэм иһигэр идэни толору баһылыыр кыах баарыттан бу хайысханы таллым. Устудьуоннуу сылдьан элбэххэ үөрэнэн, саҥа доҕоттордонон, уһуйааччыларбыттан дириҥ билиини ылыам диэн эрэнэбин.
«Нуучча тылын учууталын идэтигэр туттарсарга сананным»
Сайаана Сидорова, Чурапчытааҕы гимназия выпускнига:
– 9-с кылаастан нуучча тылын уонна литэрэтиирэтин дириҥэтэн үөрэтэбин, араас кэмпириэнсийэлэргэ, олимпиадаларга ситиһиилээхтик кыттыбытым. Ол иһин ХИФУ-га филология факультетыгар нуучча тылын учууталын идэтигэр туттарсарга сананным. Үөрэхпиттэн ситиһиилэри, эрэллээх доҕоттору уонна, биллэн турар, үөрэххэ үчүгэй усулуобуйаны күүтэбин. Барыта этэҥҥэ буолуо диэн эрэнэбин.
«Өрөспүүбүлүкэбитигэр тутуу эйгэтэ күүскэ сайдар»
Артем Дьячковский, Өрөспүүбүлүкэтээҕи лиссиэй-интэринээт выпускнига:
– Өрөспүүбүлүкэбитигэр тутуу эйгэтэ күүскэ сайдан иһэр, ол эрээри үрдүк таһымнаах исписэлиистэр тиийбэттэр дии саныыбын. Онон дойдум сайдыытыгар кыттыгастаах буолар сыалтан ХИФУ Инженернэй-техническэй институтугар туттарсабын. Үөрэхтэн, бастатан туран, кэлин идэбин толору баһылаабыт, бастыҥ үлэһит буолан тахсарбар туһуланар дириҥ, тирэхтээх билиини ыларбар эрэллээхпин.
Кэпсэттэ Алина Диодорова, ХИФУ устудьуона