Өрөспүүбүлүкэтээҕи Н.Е. Мординов-Амма Аччыгыйа аатынан “Кэскил” оҕо бэчээтин кыһата туспа тэрилтэ быһыытынан тэриллиэҕиттэн, талааннаах, булугас өйдөөх оҕолор уһулуччу бырайыактарын олоххо киллэрэр соругу туруорбута.
Елена ПОТОЦКАЯ, “Саха сирэ” хаһыат, www.edersaas.ru
Бары көрө-истэ сылдьабыт – билигин оскуола оҕото улахан киһитээҕэр интэриниэккэ хаардыы хаамар. Ол ону таба туһаныы – бүгүҥҥү кэм ирдэбилэ. Урукку сылларга “Анаабыр алмаастара” курдук бөдөҥ тэрилтэлэр болҕомтолорун тардан, оҕолор толкуйдаабыт интеллектуальнай бырайыактарын киэҥник тарҕатар туһунан толкуй суоҕа. Оттон “Кэскил” оҕо бэчээтин кыһата сүүрбэччэ бөдөҥ тэрилтэни кытта сөбүлэһии түһэрсэн, ол иһигэр улуустар баһылыктарын кытта бииргэ үлэлииргэ ыҥыран, улахан хамсааһыны таһаарда. Бу туһунан “Сахамедиа” пресс-киинигэр “Кэскил” оҕо бэчээтин кыһата ааспыт сыллааҕы үлэтин отчуотугар этилиннэ.
“Сахамедиа”пресс-киинигэр олорор миэстэ суоҕуттан сылыктаатахха, “Кэскил” оҕо бэчээтин үлэтин хайысхатын үгүс киһи ылынарын, сэргээбитин бэлиэтэ. Отчуот дакылаат быһыытынан буолбакка, улахан экраҥҥа анаарыы, хаартысканан көрдөрүү быһыытынан көрдөрүллүбүтэ уонна ону тута тэрилтэ салайааччыта быһааран испитэ олус сонуннук көһүннэ. Ол курдук, биһиги, отчуоту истээччилэр, улахан экран нөҥүө “Кэскил” оҕо бэчээтин кыһатын салалтатын кытта Тымныы полюһугар Өймөкөөҥҥө баран иһэн Чурапчыга, Тааттаҕа, Томпоҕо “сылдьан” аастыбыт. Оймөкөөҥҥө “тиийэн” улуус муниципалитетын баһылыга Михаил Захаровы кытта бииргэ үлэлээһиҥҥэ тэрилтэ бастакы сөбүлэһиитин “түһэристибит”. Ол кэннэ “кэскиллэри” “батыһа сылдьан” кинилэр бырайыактарын өйүүр ХИФУ салалтатын, Оҕо хамсааһынын тэрилтэтин, “Якутия” авиахампаанньаны, кэккэ улуустар салайааччыларын кытта “көрүстүбүт, сөбүлэһиилэргэ илии баттастыбыт”.
Маны тэҥэ, ааспыт сылга ”Кэскил” оҕо кыһатын сурунааллара “Чуораанчык” уонна “Колокольчик” Татарстан Казань куоратыгар “Татмедиа” агентство тэрийбит «Многоликая Россия» дойду суруналыыстарыгар ыытыллыбыт аһаҕас куонкурустарыгар “Оҕо иһитиннэрэр-сырдатар бырайыактара” номинацияҕа бочуоттаах III миэстэҕэ тиксибиттэрин хайгыы көрдүбүт.
“Кэскил” оҕо бэчээтин кыһата ыытар үлэтигэр санаа атастаһыыга тыл эппит дьон ордук үрдүкү технологиялаах хайысхаларга болҕомтону уурар наадатын бэлиэтээтилэр. Ол курдук, “Саха” НКИХ суруналыыһа Лена Керемясова: “Оҕо болҕомтотун тутарга, тэлэбиисэри көрөн төрөөбүт тылын, култууратын билэригэр, кинилэргэ анаан үчүгэй үөрэтэр контент оҥоһуллара наада. Ону анимация нөҥүө ситиһэн, оҕо интэриэһин тардар, иитэр-үөрэтэр соругу туруоруохха. Онуоха судаарыстыба өттүттэн өйөбүл, биир ирдэбил, сыһыан баар буоллаҕына, биһиги оҕолорбутун омук быһыытынан бэйэлэрин билинэр патриот гына иитиэхпит”, — диэн бэлиэтээтэ.
“Кэскил” уонна “Юность Севера” хаһыаттар обургу оҕолор хаһыаттара буолан, эдэр кэрэспэдьиэннэри кытта үлэ бастакы миэстэҕэ турарын салайааччы Анжелика Андреева тоһоҕолоон бэлиэтээтэ. Ол курдук, өрөспүүбүлүкэ 147 оскуолатыгар 150-тан тахса эдэр кэрэспэдьиэннэр кулууптара үлэлиир. Бу күннэргэ өрөспүүбүлүкэ оскуолаларын хаһыаттарыгар “Кэскил” хаһыат куонкурус биллэрдэ. Онно хас биирдии хаһыат оскуола олоҕун сырдатыыга сонун сүүрээни киллэрэрэ учуоттаныаҕа. Уонна, биллэн турар, Оҕо бэчээтин кыһата тэриллиэҕиттэн юнкордарга слеттары, анал үөрэхтэри ыытан, уопуттаах суруналыыстар сүбэлэрин, такайыыларын ылынан, оскуола хаһыатын оҥорууга ирдэбиллэри төһө тутуһан иһэллэрин үөрэтии, көрүү буолуоҕа. Бу тэрээһин идеята ХИФУ иһитиннэриигэ бэлиитикэтин лабораториятын кытта бииргэ үлэлээһин чэрчитинэн саҕыллыбыта. Ол курдук, кулун тутар ый бүтэһигэр Дьокуускайга өрөспүүбүлүкэ юнкордарын мунньан “ХИФУ-га “Кэскил” Академиятын эдэр кэрэспэдьиэннэрин бэстибээлэ” диэн ааттаах бастакы улахан тэрээһин ыытыллыаҕа. Онон оскуола хаһыатын таһаарааччылар бу иһитиннэриини болҕомтоҕо ылан, суолталаах тэрээһиҥҥэ хайаан да кыттыахтарын наада.
Ити курдук, “Кэскил” оҕо бэчээтин кыһатын салалтата ааспыт сылга ситиһиллибит көрдөрүүлэрин отчуоттаан баран, быйыл өссө саҥа саҥардан, байытан кэскиллээх былааннаах үлэни ыытар.
Елена ПОТОЦКАЯ, “Саха сирэ” хаһыат, www.edersaas.ru