Ааспыт сылга “Кэскил” оҕо бэчээтин кыһата 80 сыллаах үбүлүөйүгэр араас ис хоһоонноох тэрээһиннэри ыыппыта.
Елена ПОТОЦКАЯ «Саха сирэ» хаһыат, edersaas.ru
Биир улахан тэрээһин — эдэр кэрэспиэдьиэннэр слеттара. Өрөспүүбүлүкэ араас улуустарыттан оҕолор салайааччыларын кытта кэлэн, нэдиэлэ устата бэйэ-бэйэлэрин кытта уопут атастаспыттара.
— Бу суолталаах тэрээһин кэмигэр оҕо бэчээтин кыһатын салалтата өрөспүүбүлүкэ оскуолаларын эдэр кэрэспэдьиэннэр постарын салайааччылара уонна кинилэр туйахтарын хатарааччылар бэйэ хаһыатын оҥорон таһаарыыга олус наадалаах сүбэлэри утаппыттыы ылынылларын бэлиэтии көрбүппүт. Ол иһин быйылгыттан ыла “Оҕо — медиа-эйгэҕэ” диэн анал үөрэх бырайыагын бэлэмнээтибит. Манна оҕолору интервью ыларга эрэ буолбакка, араас сытыы боппуруостары ырытыыга, кэтээн көрүүнү ыытарга, анааран көрүүгэ тиийэ үөрэтиэхпит. Онно уопуттаах суруналыыстары, блогердары, хаартыскаҕа түһэрээччилэри, видеооператордары сыһыарыахпыт. Үөрэтии үс түһүмэҕинэн барыаҕа: оройуоннааҕы (пресс-кииннэр үлэлэрэ), өрөспүүбүлүкэтээҕи (оҕо прессатын фестивала, слеттара), регионнааҕы (норуоттар икки ардыларынааҕы оҕо прессатын кэмпириэнсийэлэрэ, олимпиадалара) таһымнаах тэрээһиннэр. Бырайыак сүнньүнэн бастыҥнар Москваҕа тиийэн, “Пионерская правда ”хаһыакка стажировкаланыахтара. Оччотугар, биллэн турар, оскуола сааһыттан маннык үөрэҕи ааспыт оҕолор өрөспүүбүлүкэ таһымнаах улахан суруналыыстарга тиийэ үүнэн тахсаллара чахчы, — диэн бэлиэтиир “Кэскил” оҕо бэчээтин кыһатын салайааччыта Анжелика Андреева.
Онон бу күннэргэ суруналыыстыка үлэтин умсулҕаннаах эйгэтигэр оскуола саастан саҕалаан кыттар улахан бырайыак олоххо киириитэ саҕаланыаҕа.
Елена ПОТОЦКАЯ, edersaas.ru