Бүгүн Оҕо көмүскэлин күнүгэр «Кэскил» Оҕо бэчээтин кыһата «Keskil14.ru» электроннай сайты аста. Аныгы үйэҕэ оҕо барыта интэриниэти хото туһанар кэмигэр бу олус туһалаах хайысха.
Оҕо бэчээтин кыһатын салалтата үлэтин саҥа тосхолун тобуларын саҕана өрөспүүбүлүкэ бары бөдөҥ тэрилтэлэрин кытта бииргэ үлэлээһин сөбүлэҥин түһэрсибитэ. Ол үлэ хайысхата билигин олохтоохтук сааһыланан, торумнанан олоххо киирэн эрэрин бүгүн сүрэхтэнэр сайт туоһулуур. «Кэскиллэр» бииргэ үлэлиир соруктаах «Анаабыр алмаастара» тэрилтэни кытта дуогабар түһэрсиилэрин түмүгэр, бу күһүн балаҕан ыйыгар «Кэскил» Оҕо бэчээтин кыһатын мобильнай сыһыарыыта үлэлиэҕэ. Бу Алексей Илларионов IT-оскуолатын иитиллээччилэрин үлэлэрин түмүгүнэн буолуоҕа.
— Бу күннэргэ РФ президенэ Владимир Путин Оҕо көмүскэлин эйгэтигэр кэлиҥҥи биэс сылга ыытыллыбыт оҕо интэриэһин көмүскүүр Национальнай стратегияны олоххо киллэрии хаамыытын түмүктээн, кэлэр 10 сылы Арассыыйаҕа Оҕо саас сылларынан биллэрдэ. Кэнчээри ыччаттарбыт кэскиллэрин туһугар күннээҕи үлэбит-хамнаспыт оҕолорбутугар туһуланарыгар кыһаллыахтаахпыт. Онуоха судаарыстыба маннык дьоһуннаах өйөбүлү оҥороро хайҕаллаах суол. Оттон биһиги, оҕо духуобунай өйө-санаата сайдыытыгар үлэлэһэр дьон, бэчээт эйгэтин үлэһиттэрин сүрүн сорукпут — оҕо ааҕарыгар интэриэһи тардыы, олоххо көхтөөх гражданнары иитэн таһаарыы, — диэн бэлиэтиир «Кэскил» Оҕо бэчээтин кыһатын салайааччыта Анжелика Андреева.
Аны эмиэ бүгүҥҥүттэн, бэс ыйын 1-кы күнүттэн, өрөспүүбүлүкэтээҕи I «Кэскил» диэн Оҕо бириэмийэтигэр номинаннары талыы биллэрилиннэ. «Эдэр кэрэспэдьиэн», «Сыл спортсмена», «Айар кут хаһаайына», «Эдэр учуонай», «Сыл лиидэрэ. Уопсастыбанньык», «Эдэр IT-шник» — бу курдук алта хайысхалаах бириэмийэлэргэ кимнээх тиксэн дьоллонуохтарай?
— Бэс ыйын 17 күнүгэр диэри бу саҥа аһыллыбыт «Keskil.ru» электроннай сайтка оҕолор төрөппүттэрин уонна учууталларын кытта бииргэ сүбэлэһэн, бу бириэмийэҕэ кыттыахха сөптөөх хайысханы талан, араас бырайыактары, хаартыскалары, хаһыаттары, биир тылынан, бу номинацияларга сөп түбэһэр диэбит докумуоннары «Кэскил бириэмийэтэ» диэн суруйан ыытыахтарын наада. Бириэмийэ туһунан балаһыанньаны http://keskil14.ru сайтка киирэн ааҕыҥ. Матырыйааллары keskil_online@mail.ru электроннай почтаҕа ыытыахтарын наада. Батсаап нүөмэрэ: 8 999 244 89 99. Онон бу аадырыска билсиэххитин сөп, — диэн өссө биир саҥа бырайыагы билиһиннэрэр Анжелика Егоровна.
Бу манан бүппэт. Мөһөөччүктэн кэһиитин хостуурдуу, «Кэскил» Оҕо бэчээтин кыһатын салайааччыта Анжелика Андреева бииртэн биир сонун идиэйэни билиһиннэрэн иһэр. Ол курдук, бэс ыйын 26 күнүттэн «Кэскил» медиа-оскуола үлэтин саҕалыыр. Манна араас хайысхаҕа үлэлии сылдьар суруналыыстар маастар-кылаастары ыытыахтара, хаартыскаҕа уонна видеоҕа устарга үөрэтиэхтэрэ. Өссө интернеккэ бэйэ блогун аһан үлэлэтэргэ тиийэ (!) маастар-кылаас баар буолар эбит. Онон айар куттаах оҕолору бу оскуола сайыҥҥы үөрэххэ ыҥырар. Маны таһынан араас таһымнаах уонна хайысхалаах үлэ барарын туһунан киһи этэ да барбат.
Өссө биир кэрэхсэбиллээх сонун. «Кэскил» бэчээт кыһатыгар үлэлиир суруналыыстар бары кэриэтэ оҕо суруйааччыларыгар тиийэ үүннүлэр. Ол курдук, соторутааҕыта «Якутия» холдинг кинигэ бэчээттиир кыһаҕа эдэр суруналыыстар «Кэскил» уонна «Юность Севера» хаһыаттарга таһаарбыт кэпсээннэрин хомуйан, оҕолорго аналлаах дьоҕус кинигэлэри бэчээттэттилэр. Бу бырайыак икки улахан тэрилтэ «бастакы хараҥаччытынан» буолар. Бииргэ үлэлээһиҥҥэ былаан үгүс диэн этэллэр тэрилтэлэр салайааччылара.
Бу курдук, «Кэскил» Оҕо бэчээтин кыһатын үлэһиттэрэ бэрт интэриэһинэй уонна сонун бырайыактары: «Барыта оҕо ааҕарын туһугар», — диэн толкуйунан сирдэтэн, олоххо киллэрэр соруктаах күннэтэ түбүгүрэллэр.
Елена ПОТОЦКАЯ, «Саха сирэ» хаһыат, edersaas.ru