“Кэшбери”-ни төрүттээччи Артур Варданян платформа сабыллыбытын, ол оннугар саҥа хампаанньа аһыллан эрэрин туһунан иһитиннэрдэ. «Итиниэхэ олоҕуран, саайтка регистрацияланар, харчыны угар, ыытар, устар кыаллыбат, дьону үөрэтэр кииннэр үлэлэрэ эмиэ тохтоото», — диэн YouTube ханаалыгар кэпсээтэ.
edersaas.ru
“Кэшбери” хас биирдии туһанааччытын тус кабинетыгар саҥа сирэй аһыллыа. Онно төһө харчыгыт хаалбыта, хампаанньа төһөнү төнүннэриэхтээҕэ ыйылла сылдьар. Ол харчыны кыраапык оҥорон, криптовалютанан төлүөхпүт», — диэн быһаарда кини.
Дьон уопсай аймалҕаҥҥа оҕустаран, манньыаттарын чэпчэки сыанаҕа мэнэйдэспэттэригэр сүбэлээтэ. Ый бастакы күнүн аайы үбү төттөрү таһаарар кыах бэриллиэ.
“Кыраапыгы бырыһыан быһыытынан оҥоруохтара. Холобур, 100 тыһ. укпут киһи ахсынньы 1 күнүгэр 5% ылыахтаах, оччотугар кини ити күн биэс эрэ тыһыынчаны устуон сөп”, — диир кини.
Артур Варданян “Кэшбери” ис тутулун GDC диэн саҥа хампаанньаҕа көһөрөн киллэрэн эрэрин туһунан эттэ. Онон “Кэшбери”-ттэн харчыларын сатаан ылбатах дьон уурдарыылара ити GDC саҥа платформаҕа көһөн биэриэҕэ. Дьон бириэмэ биэрэн, күүтэ түһэллэригэр көрдөһөр.
«Мин эһиги хас биирдиигит туһугар сүрэхпинэн ыалдьабын. Миэхэ итэҕэйбит дьон дьоллоох буоларын туһугар үлэлиибин», — диэн түмүктээтэ YouTube биэриитигэр.
Киин баан ааҕыытынан, “Кэшбери” үп-харчы пирамидата 3 млрд. солк. хомуйан, дьону ночоокко тэппит. Ол харчы хаһаайыттарыгар төннөрө билиҥҥитэ саарбах соҕус.
Марианна ТЫРТЫКОВА, «Саха сирэ» хаһыат, edersaas.ru