Муус устар 2 күнүгэр керлинг диэн спорт саҥа, олимпийскай көрүҥэр өрөспүүбүлүкэтээҕи бастакы турнир ыытыллан түмүктэннэ. Күрэхтэһии кыайыылаахтара уонна кыттыылаахтара бары Саха сиригэр керлини сайыннарыы историятыгар киирдилэр.
Керлинг диэн, мууска хамаанданан оонньооһун. Хамаандалар уочаратынан мууска анал снаряды ыытан, бэлиэтэммит сиргэ тиэрдиэхтээхтэр. Састаапка түөртүү киһи киирэр. Снаряд тустаах сиригэр үчүгэйдик барарын, эбэтэр утарсааччылар снарядтарын туоратарын инниттэн анал суокканан сотоллор. Оонньуу 10 түһүмэхтэн турар. Биир түһүмэххэ хамаандалар 8 снаряды ыыталлар. Кыайыылааҕынан, хас түһүмэх аайы элбэх очукуону ылбыт хамаанда ааттанар.
Турнир кыайыылааҕынан Дьокуускай куораттан “Эллэй Боотур” хамаанда буолла. Хамаанда састаабыгар С.С.Данилов, А.П.Собакин, П.С.Павлов, С.П.Никитин киирдилэр. Бастакы күрэхтэһии үрдүк тэрээһиннээхтик ыытыллыбытын кыттааччылар уонна ыалдьыттар бары биир киһи курдук бэлиэтииллэр.
Ити туһунан биһиэхэ Керлинг Саха сиринээҕи федерациятын генеральнай дириэктэрэ Мария Пудова иһитиннэрэр:
— Нэһилиэнньэ спорт бу саҥа көрүҥүн сүрдээҕин сэҥээрдэ, — диэн, Мария тэрээһин табыллыбытын астынан кэпсээтэ. — Дьиҥ чахчы бу икки күн спорт уонна доҕордоһуу бырааһынньыгынан буолла. Араас эйгэ үлэһиттэрэ (учууталлар, скульптордар, музыканнар, спортсменнар, устудьуоннар, үрдүкү кылаас үөрэнээччилэрэ), барыта 70 киһи бары биир хамаанда буолан, күрэхтэстилэр. Оннооҕор хотторбут хамаандалар күрэхтэһиигэ кыттыбыттарыттан дуоһуйууну ыллылар. Кыайыылаахтары сотору кэминэн Новосибирскайга, эбэтэр Москваҕа ыытыллар күрэхтэһиигэ ыытарга былаанныыбыт. Ону тэҥэ, Нам улууһун чөмпүйэнээтин тэрийэр соруктаахпыт. Чуолаан, бу улуустан төрүттээх Григорий Максимов курдук, саамай чаҕылхай ыалдьааччылар бааллар.
Ити курдук, аан бастаан ыытыллыбыт, Саха сирин спорка историятыгар киирэр маҥнайгы күрэхтэһиигэ түөртүү киһиттэн састааптаах 12 хамаанда (Нам, Үөһээ Бүлүү, Бүлүү, Ньурба, Мэҥэ Хаҥалас, Чурапчы улуустара, Дьокуускай-1, Дьокуускай эр дьоҥҥо уонна дьахталларга хамаандалара, “Ночной дозор”, “Эллэй Боотур”, ЭПЛ Даймонд”) уонна доруобуйаларынан хааччахтаах икки хамаанда (Сунтаар, Дьокуускай) күрэхтэстэ.
Икки күннээх күрэхтэһии түмүгүнэн бириистээх миэстэлэри үллэстии маннык буолла: бастакы миэстэ — “Эллэй Боотур” хамаанда, иккис миэстэ – Мэҥэ Хаҥалас улууһа, үһүс миэстэ – Чурапчы улууһа.
Бу олимпийскай көрүҥү өрөспүүбүлүкэҕэ саҥа арыйааччылар диэтэххэ, хамаандалар үчүгэй оонньууну көрдөрдүлэр. Кырдьык, биһиэхэ керлинг саҥа сайдан эрэрин быһыытынан, спортсменнар бу көрүҥ быраабылатын дьүүллэһэн уонна бэйэлэрэ күрэхтэһэн көрөн, үөрэннилэр уонна билистилэр диэххэ наада. Итиэннэ хара бастакыттан сүрдээҕин сөбүлээтилэр.
Керлинг – араас идэлээх дьоҥҥо доҕордуу сыһыаны олохтуур хамаанданан күрэхтэһии. Спорт бу көрүҥүнэн дьарыктаныан баҕалаахтар ахсааннара күннэтэ элбии турар.
Петр ПАВЛОВ, “Саха сирэ”, www.edersaas.ru