Сайтпытыгар үнүр эрэ суруйбуппут, күнүүлээһинтэн тахсыбыт буруй туһунан. Дьокуускай куорат олохтооҕо ойоҕун «көссүүлэспиккин» диэн күнүүлээн, сирэйин сутуругунан үлтү кэбилээбитин туһунан. Аны бу Эдьигээҥҥэ биир оннук күнүүһүт эргэ суут уурааҕа тахсыбыт.
Суут быһаарбытынан, 2018 сыл сэтинньи 11 күнүгэр Эдьигээн 29 саастаах олохтооҕо бииргэ олорор дьахтарын күнүүлээн, моонньуга быһаҕынан анньыбыт. Уонна өллө дии санаан, быһылаан сириттэн куотар аакка барбыт.
Ити иннинэ күнүүлээһинтэн сылтаан куруук этиһэллэр-айдаарсаллар эбит. Ол иһин эр киһи дуома бөһүөлэктэн барарга быһаарыммыт. Ол барыан иннинэ дьахтарыгар төлөпүөннээбит, онуоха өлүү болдьохтоох, ол кэпсэтэр кэмнэригэр, дьахтар кинини атын киһи аатынан ааттаан кэбиспит.
Дьэ, онуоха харахтарын үүтэ көстүбэт буолуор диэри үллэ кыыһырбыт киһи дьахтарыгар быһаарса тиийэн баран, быһахтаан кэбиспит…
Дьолго, быраастар көмөлөрүнэн, күнүүлээһин сиэртибэтэ буолбут дьахтар тыыннаах хаалбыт.
Суут уурааҕынан, аныгы Отелло 6 сыл 8 ыйга кытаанах эрэсиимнээх холуонньаҕа көҥүлэ быһыллыбыт.
Бириигэбэр сокуоннай күүһүгэр киирбит. Бу туһунан РФ Силиэстийэлиир кэмитиэтин Саха сиринээҕи управлениета иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.