Бороҕоҥҥо (Уус Алдан улууһугар) Олоҥхо дьиэтигэр сонун тэрээһин буолла. Улуустааҕы сокуоннай саастарын туола илик оҕолору реабилитациялыыр киин аан дойду дьахталларын күнүнэн “Кэрэтийии” диэн бырайыагын түмүктүүр дьоро күнүн үрдүк таһымҥа тэрийэн ыытта. Тэрээһин туһунан киин дириэктэрэ Сталина Данилова иһитиннэрдэ.
—Волонтер сылынан тэрээһиҥҥэ хаһааҥҥытааҕар да элбэх спонсор, волонтер баҕа өттүлэринэн кыттыбыттара кэрэхсэбиллээх. Бырааһынньыктыы киэргэтиллибит саалаҕа сааскы күүтүүлээх бэлиэ күнү көрсө биэс ийэ күннээҕи түбүктэн арыый тэйэн хараҕы сымнатар, киһини эрэ үөрдэр гына сир симэҕинии симэннилэр, кэрэ, кырасыабай буола уларыйан бар дьоннорун иннигэр таҕыстылар. Кинилэргэ спонсордар: Николаева Г.П., Саввина С.С., Афанасьева М.М., Татаринова Х.Е., Кудрина А.Г., Никифорова А.И. бэлэхтэри туттардылар. Долгутуулаах тэрээһиҥҥэ араас идэлээх волонтердар, парикмахер, визажист, хаартыскаҕа түһэрээччи турунан. олус кыһаллан көмөлөстүлэр, үлэлэстилэр. Маны таһынан партнер-тэрилтэлэрбит улуустааҕы кииннэммит бибилэтиэкэ ситимэ, «Тойон Мүрү» култуура киинэ, Мүрү нэһилиэгин дьаһалтата көхтөөх кыттыыны ылбыттарын астына, киэн тутта бэлиэтиибит.
Үөрүүлэриттэн сирэйдиин сырдаабыт, мичилийэ кыыспыт кэрэ-мааны, кырасыабай ийэлэр сценаҕа тахсыылара көрөөччүлэр дохсун ытыстарын тыаһынан арыалланна. Мүрү нэһилиэгин баһылыгын солбуйааччы Макеева М.И. бу дьоро күнүнэн эҕэрдэлээн хас биирдии кыттааччыга тыыннаах сибэкки дьөрбөтүн туттарбыта долгутуулаах киэһэни өссө истиҥ оҥордо. Көрөөччүлэр иннилэригэр тахсыбыт ийэлэр барахсаттар үөрэн мичилийбит харахтарын көрөммүт, санааларын истэммит тэрийбит үлэбит үтүө түмүктэриттэн улаханнык үөрдүбүт.
Бырайыакка кыттыбыт ийэлэр наһаа үөрбүттэрин, астыммыттарын этэн туран, кинилэр тустарыгар кыһаллыбыт, сүүрбүт-көппүт бар дьоҥҥо махтал истиҥ тылларын анаатылар. Тэрээһиммит табыллыбытыттан санаабыт көтөҕүлүннэ. Кэрэ дьоҥҥо — Ийэлэргэ бу курдук үөрүүнү, дьолу бэлэхтии турар баҕабыт өссө улаатта.
Биһиги корр., «Саха сирэ» хаһыат, edersaas.ru