Худуоһунньук Кыыдаана Игнатьева бырааһынньыгынан бар дьонун эҕэрдэлиир уонна үлэтин-хамнаһын туһунан сырдатар.
Кыыдаана маннык эҕэрдэлээтэ:
—Күндү Сахам сирин олохтоохторун, хаһыат ааҕааччыларын, күөххэ үктэммиппитинэн, Маай бырааһынньыгынан эҕэрдэлиибин!
Айылҕа тиллэр кэмэ кэлэн, бары таһырдьа, айылҕаҕа тахсыахпытын, чугас дьоммутун көрсүөхпүтүн баҕарабыт. Ол эрээри, билигин аан дойду үрдүнэн турар уустук балаһыанньаны өйдөөн, бэйэ-бэйэбитигэр, чугас дьоммутугар харыстабыллаахтык сыһыаннаһарбыт булгуччулаах. Маай бырааһынньыктарын бары дьиэҕэ олорон, дьону кытта алтыспакка ылыахха диэн ыҥырабын.
Хас биирдиибит дьарыктаах, үлэлээх. Онон дьиэҕэ олоруу кэмин туһалаахтык атаарар кыах баар. Билигин күн киириитин, тахсыытын дьүһүннэринэн хоһуйан уонна киирии ааҥҥа үктэл уобараһын уруһуйдуу сылдьабын. Бүтэрдэхпинэ инстаграмҥа угуоҕум.
Барыгытыгар кытаанах доруобуйаны, тулууру, дьулууру баҕарабын. Кэрэни кэрэхсээҥ, үтүөнү үксэтиҥ!
Бэлэмнээтэ Ньургуйаана Иванова, “Саха сирэ” хаһыат, edersaas.ru