Быйыл элбэх үбүлүөйдээх сыл. Саха аптаныамыйата тэриллибитэ 100 сыла, биллэр-көстөр улахан суруйааччыларбыт, билиҥҥи кэмҥэ тахсыылаахтык суруйар ааптардарбыт — барыта 83 киһи — үбүлүөйдэрэ бэлиэтэнэр диэн суруйаллар.
Хамсык кэмэ буолан, үгүс тэрээһиннэр куйаар ситиминэн ыытыллаллар.
Мин өр кэмҥэ үлэлээн ааспыт оскуолам учууталлара (Мэҥэ Хаҥалас, Наахара уопсай үөрэхтээһин оскуолата) куйаар ситиминэн сонун ааттаах бырайыактары үлэлэтэллэрэ кэрэхсэнэр. Бырайыагы сүрүннээччилэр: саха тылын уонна литэрэтиирэтин учуутала Васильева Венера Семёновна уонна оскуола бибилэтиэкэрэ Жиркова Светлана Анатольевна.
Соторутааҕыта Наахара оскуолатын учууталлара Саха Өрөспүүбүлүкэтин 100 сыллаах үбүлүөйүгэр анаан Ойуунускай ааҕыыларын ыыттылар. Саамай хайҕаллааҕа — кинилэр Былатыан Ойуунускай «Сүүс сыллаах улуу былаан» диэн айымньытын талбыттар! Оскуола учууталлара бука бары, ханнык биридимиэтиттэн тутулуга суох, айымньыны баһыттан атаҕар диэри биир тыынынан дорҕоонноохтук аахпыттарын истэммин, бэркэ астынным, дуоһуйдум! Ааҕыы таһыма лаппа намтаан турар кэмигэр учууталлар бэйэлэринэн үчүгэй холобуру көрдөрбүттэрэ хайҕаныан эрэ сөп.
Наахара оскуолатыгар кэлиҥҥи сылларга оҕону ааҕыыга сыһыарар, ааҕыынан умсугутар сыаллаах тэрээһиннэр итинэн эрэ бүппэттэр. Үөрэнээччилэр ортолоругар итинник ис хоһоонноох үлэ утумнаахтык ыытыллар. Маныаха нэһилиэк иһинээҕи култуура киинин бибилэтиэкэрэ Никанорова Ирина Дмитриевна эмиэ тирэх буолар.
Бу күннэргэ биир эмиэ саҥа бырайыак үлэтин саҕалаата. Ол – “Аптаныамыйа 100 сыллаах үбүлүөйүгэр — 100 айымньыны!” диэн. Бырайыак кыттыылаахтара саха бэйиэттэрин уонна суруйааччыларын айымньыларын: хоһооннору, үгэлэри, олоҥхоттон, кэпсээнтэн, сэһэнтэн, романтан быһа тардыылары дорҕоонноохтук ааҕыахтаахтар. Маныаха ким баҕарар кыттара көҥүл. Оскуола үөрэнээччилэрэ, төрөппүттэр, бэтэрээн учууталлар, о. д. а. ааҕаары бэлэмнэнэ сылдьаллар.
Маннык ааҕыылар төрөөбүт сахабыт тылыгар интэриэһи үөскэтэллэр, оҕоҕо, улахан да киһиэхэ уран тыл умсулҕанын иҥэрэллэр.
Елена Прокопьева, уопсастыбаннай кэрэспэдьиэн