Анаабыр улууһугар сүппүт дьон булуллан, этэҥҥэ Үрүҥ Хайаҕа тиийдилэр. Кинилэри МПЧ-2 караул начальнига Илья Попов салалталаах көрдүүр бөлөх булла.
Көрдүүр бөлөх сүппүт дьон суолларын булбут. Среднэй үрэх устунан тахсан, халлаан хараҥарыыта уот кыламныырын көрбүттэр. Сүппүт дьон бураан банаарын уотун көрөн, кутаа оттубуттар эбит. Бу туһунан Илья Попов СИА суруналыыһыгар кэпсээтэ.
Туприннар уонна Спиридонов доруобуйаларын туруга этэҥҥэ. Кинилэр Үрүҥ Хайаҕа айаннаан иһэн хараҥаҕа суолларын сүтэрбиттэр, аны бурааннарын уматыга бүппүт. Бастакы икки түүн таһырдьа хоммуттар. Онтон кэнники түөрт күн булчуттар үүтээннэрин булан, онно олорбуттар. Бастакы үүтээннэригэр туох да ас суох буолан биэрбит, онтон иккис үүтээни булбуттар. Онно, хата, булчуттар хаһаастара баар эбит.
«Бөртөлүөтү көрбүппүт, далбаатыы сатаабыппыт, биһигини көрбөтөхтөрө. Көрдөөччүлэр бурааннарын уотун көрөн тута кутаа оттубуппут. Көстүбүппүтүгэр кыргыттарым олус үөрдүлэр«, — диир Олег Туприн. Оттон Кэрэчээнэ: «Аттыбар аҕам баар буолан долгуйбатаҕым, этэҥҥэ буолуохпут диэн эрэнэрим. Биһиги туспутугар долгуйбут Сахам сирин олохтоохторугар улахан махталбын ыытабын«, — диэн этэр.