Виктория Варламова «Кэрэ ситимэ» бырайыага 400-кэ ийэни уонна кыыһы түмтэ
Былырыын Оҕо көмүскэлин күнүгэр Дьокуускай куорат киин болуоссатыгар ийэлэр кыргыттарын кытары үҥкүүлүүллэрин сэргии, сэҥээрэ көрбүтүм. Кыыспын кытары эмиэ кинилэр курдук үҥкүүлээбит киһи дии санаабытым…
edersaas.ru
Икки сыллааҕыта 26-с оскуола базатыгар төрөппүттэр Виктория Варламова-Контоева уонна Екатерина Романова көҕүлээһиннэринэн «Кэрэ ситимэ» устуудьуйа аһыллыбыта. Кыргыттар ийэлэриниин үҥкүүлүүргэ үөрэнэн, сыыйа куоракка, өрөспүүбүлүкэҕэ ыытыллар кэнсиэртэргэ тиһигин быспакка кыттар буолбуттара.
Билигин «Кэрэ ситимэ» устуудьуйа уопсастыбаннай хамсааһыҥҥа кубулуйан, Дьокуускайы уонна 10 улууһу хабан, барыта 400-кэ ийэ уонна кыыс бырайыакка кыттыста.
Кыргыттар аан дойдутааҕы күннэрин көрсө, «Кэрэ ситимэ» уопсастыбаннай бырайыак көҕүлээччитэ, төрөппүт, биллэр суруналыыс
Виктория Варламова-Контоеваны кытары көрсөн кэпсэппиппэр:
—— Төрөппүт эппиэтинэһин үрдэтиигэ, ийэ уонна кыыс оҕо духуобунай ситимнэрин бөҕөргөтүүгэ, дьиэ кэргэҥҥэ биир интэриэһи олохтооһуҥҥа туһуламмыт «Кэрэ ситимэ» уопсастыбаннай бырайыакпыт кылгас кэм иһигэр дьон интэриэһин тарта, элбэх киһини түмтэ. Биһиги оҕону уонна төрөппүтү кытта үлэҕэ үҥкүүнү механизм быһыытынан талан үлэлиибит. Бу хас биирдии киһиэхэ чугас, судургу көрүҥ нөҥүө сүрдээх көдьүүстээх үлэ тэриллэр кыахтаах эбит. Аныгы түргэн тэтимнээх олоххо бэл, биир дьиэҕэ олорор ыалга сүрэх-дууһа ситимэ чарааһыы быһыытыйда. Ийэ үлэ кэннэ тэлэбиисэр иннигэр олорбокко, оҕо гаджекка хаһыспакка, сиэтиспитинэн үҥкүү дьарыгар бараллар. Ол сылдьан кэпсэтэллэр, чугасыһаллар, биир интэриэстэнэллэр, доҕордоһоллор. Бииргэ култуурунай-духуобунай өттүнэн сайдаллар, сынньаналлар, стресстэрин усталлар. Бу маннык сонун хайысха Россияҕа соҕотох уопут буолар”,-— диэн санаатын үллэһиннэ.
Кырдьык, бу олус туһалаах уонна наадалаах бырайыак диэн биир бэйэм сыаналыыбын. Хомойуох иһин, сорох төрөппүттэр уонна оҕолор социальнай ситимнэринэн үлүһүйэр буоллулар. Маннык түгэҥҥэ бэйэ-бэйэлэрин кытары аһаҕастык кэпсэппэттэр, оннооҕор күннээҕи сонуннарын, санааларын кытары атастаспаттар.
Оттон «Кэрэ ситимэ» бырайыак өссө кэҥээн, улаатан, элбэх кыыһы, төрөппүтү түмэригэр баҕарыа этим.
Анивера АКИМОВА, » Саха сирэ» хаһыат, «Эдэр саас» сайт.