Хатаска “Тускул” Култуура киинигэр “Кэрэ Куо” ансаамбыл тэриллибитэ 5 сылыгар анаммыт айар киэһэ ситиһиилээхтик ааста.
edersaas.ru
Биэс сыл… Эттэххэ дөбөҥ. Онтон эн ол тухары алтыспыт, үөрүүгүн, хомолтоҕун үллэстибит, ол сыллар усталарыгар дьаныһан туран дьарыктаммыт, сайдыбыт-үүммүт, сатаабаккын сатыыр буолбут буоллаххына – ити кырата суох кэм. Онно өссө хаарга-ардахха, сииккэ-силбиккэ хаампыт буоллаххына, дьэ, кырдьыга да үрүҥү-хараны араарбыт буолаҕын.
Онон, » Кэрэ Куолар» вокальнай ансаамбыл бу күҥҥэ, бу кэмҥэ этэрдээх, кэпсиирдээх, көрдөрөрдөөх, иһитиннэрэрдээх буолбута астык.
Бэлэмнэнии үлэтэ бу ааһан эрэр сылга үктэнээт да, саҕаламмыта, кэпсэтиллибитэ, ырытыллыбыта. Инньэ гынан, саҥа ырыалар таҕыстылар, хас биирдии ырыаһыт миэнэ диир сольнай ырыаланна (туһугар туспа ситиһии), өссө методическай көмөлөөх, ноталаах ырыалаах, дискэлээх кинигэ таҕыста.
Киһи үөрэрэ, киэн туттара диэн, кыргыттар хас биирдиилэрэ чахчы да чаҕылхайдар, киһиэхэ сэһэргиирдээхтэр, элбэҕи сатыыллар, оҥороллор, киэҥ эйгэлээхтэр, дириҥ билиилээхтэр. Ырыа, буолаары буолан күргүөм ырыа түмэр, сомоҕолуур, үөрэтэр өйдөбүлүн эттэринэн-хааннарынан, өйдөрүнэн-санааларынан иҥэриммит дьон.
Бүгүн «Кэрэ Куолар» кэнсиэртэригэр кэлбит көрөөччү ити үөһээ этиллибити көрө-истэ сэргээтэ, итэҕэйдэ, дууһалыын ылынна, сүрэхтиин сылаанньыйда. Айар-тутар суол умсулҕанын уйан дууһаларыгар ылыммыт «Кэрэ Куолар» ырыалара кэлбит киһини барытын сүүс бырыһыан эйгэтин иһигэр киллэрдэ, биир сомоҕо оҥордо.
Манна өссө биири хайаан да бэлиэтээн, чуолкайдаан этиэхпин баҕарабын. Кыргыттар хас биирдиилэрин дьиэ кэргэттэрэ бары долгуйа, киэн тутта көрө кэлбиттэрэ ама кими үөрдүө, сүргэтин көтөҕүө суоҕай? Мин санаабар, уолаттар (кэргэттэр) сүрэхтэригэр, дууһаларыгар кэрэ иэйии итии салгына илгийдэ, бииргэ буолары биһирээһин эбилиннэ. Ол аата, дьиэ кэргэн акылаата өссө чиҥээтэ. Ити тухары ырыа эйгэтэ оччо киэҥ, дириҥ бөлөсүөпүйэлээх, үйэлэри уҥуордуур улуу күүстээх.
Ансаамбыл бу курдук ис туруктаах, иллээх-эйэлээх буолара түмэр, мунньар дьонтон улахан тутулуктааҕа биллэр суол.
Дьэ, бу манна биэс сыллааҕыта ып-ыраас илиистэн саҕалаан, күн бүгүн буһан-хатан, билиитэ кэҥээн, сатыыра элбээн, айылҕа биэрбит талаанын өссө чочуйан, “чахчы да миэнэ эбит” диэн астына, дуоһуйа үлэлиир Татьяна Окорокова уонна умсугуйан, итэҕэйэн туран ырыаҕа уһуйар Алексей Кириллович Калининскай-Луҥха оруоллара улахан. Үлэлииргэ кыаҕы, көҥүлү биэрэр муударай салайааччы Людмила Чепалова оруолун эмиэ бэлиэтиэҕи баҕарыллар. »Тускул” үлэтин биир уратытынан бары биир киһи туһугар, биир киһи барыбыт туһугар диэн тускуллаах үлэлээһинэ буолар. Онон уот-күөс, тыас-уус, сценаҕа буолар барыта күлүм-чаҕыл буоларын туһугар, сцена кэтэҕэр баар дьон өйдөһөн-өйөһөн үлэлииллэрэ — барыта кэлэктиип үлэтэ. Кэнсиэри кэлиҥҥи кэмҥэ куруутун бастыҥнар ааттарыгар ааттанар, айар-тутар суол аартыгын арыйбыт Петр Кулаковскай сэргэхтик салайан ыытта, ылбаҕай ырыатын бэлэхтээтэ.
»Кэрэ Куо» ансаамбылы бу бэлиэ күнүнэн олохтоох дьаһалта салайааччыта Евгений Петрович кэлэн эҕэрдэлээбитэ, бэлэх туттарбыта махталлаах суол. »Сайдам» вокальнай ансаамбыл кыргыттарга кинигэ бэчээттээһинигэр көмө сэртипикээт утары ууннулар. Онтон “Тускул” Култуура киинэ хас биирдиилэригэр кинигэ бэлэхтээбитэ — кыргыттар үлэлэрин үрдүктүк сыаналааһын.
“Саха сирэ”, edersaas.ru сайтка анаан Наталия РУФОВА
Ааптар хаартыскалара