«Кэрэ Куо» иһитиннэрэр-биллэрэр портал 2016 сыл түмүгүнэн «Сыл бастыҥ дьахтара» диэн номинацияларынан бириэмийэ түмүгүн таһаарда.
Елена ПОТОЦКАЯ, «Саха сирэ» хаһыат, https://edersaas.ru
— Тэрээһин Аан дойду дьахталларын күнүнэн сибээстээн, СӨ Дьахталлар тэрилтэлэрин сойууһун уонна Дьокуускай куорат дьаһалтатын өйөбүллэринэн ыытылынна. Бириэмийэни туттарыы сиэрин-туомун үөрүүлээхтик ыытыы — уопсастыбаҕа дьахтар социальнай статуһун үрдэтии, кини киин куорат уонна өрөспүүбүлүкэ сайдыытыгар тус кылаатын сыанабыла, — диэн бэлиэтээтэ өрөспүүбүлүкэ дьахталларын тэрилтэлэрин Сойууһун бэрэссэдээтэлэ Анжелика Андреева кыайыылаахтары эҕэрдэлииригэр.
Лауреаттарга бочуоттаах дипломнары кытта «Харысхал» ювелирнай фирма сахалыы тыыннаах брошкатын туттардылар.
— Биһиги порталбытыгар сылы быһа бириэмийэбит номинаннарын ситиһиилэрин, сонун арыйыыларын сырдаттыбыт, олоххо көхтөрүн анаан кэтээн көрдүбүт. Кэрэхсэбиллээҕэ баар, араас хайысханан куонкурус кыайыылаахтарын норуот бэйэтэ куоластаан, кыайыылааҕы быһаарда, — диэн бэлиэтиир «Кэрэ Куо» портал салайааччыта, куонкурус тэрийээччитэ Туйаара Алаас.
Кырдьык да, ааспыт сылга «Якутия» авиахампаанньа бортпроводнига Юлия Осипова, оҕо суруйааччыта Александра Киселева, «Харысхал» Аһымал пуондатын дириэктэрэ Вера Душкевич, араас таһымнаах үҥкүү куонкурустарын кыайыылааҕа Диана Егорова-Lil Di, стилист Мария Давыдова, искусствовед Зинаида Заболоцкая курдук номинаннар өрөспүүбүлүкэҕэ эрэ буолбакка, Арассыыйаҕа тиийэ биллэ сырыттылар.
КЫАЙЫЫЛААХТАР:
«Спорт деятелэ» — Анастасия Диодорова
«Култуура деятелэ» — Диана Егорова-Lil Di
«Наука деятелэ» — Зоя Тарасова
«Уопсастыба деятелэ» — Кыыдаана Игнатьева
«Муода индустриятын деятелэ» — Зинаида Заболоцкая
«Үтүө санаа кыымын саҕааччы» — «SOS Дети Якутии»
«Бэйэтин идэтин уһулуччу баһылааччы» — Сардана Саввина
«Дьахталларга аналлаах инста-паблик» — «Instamam Yakutia»