Кэрэ буолуу: тоҕо? төһөнүй?

Бөлөххө киир:

Хас биирдии кыыс, дьахтар кэрэ дьүһүннээх буолуон баҕарар. Ол киһи сааһыттан, ханна олороруттан, олоҕун усулуобуйатыттан тутулуга суох. Аныгы үйэҕэ кэрэ аҥаардар бэйэлэрин көрүнэр, тупсаҕай буоларга дьулуһар буоллулар.

Саха сиригэр саамай киэҥник тарҕаммыт кэрэ ­буолуу ньымаларын туһунан сиһилии сырдатабыт. Бу процедураны оҥорторбут кэрэ ­аҥаардары кытта кэпсэттибит. Европеизация

— халтаһа оҥорторуу.  Бу эпэрээссийэни үөһээ халтаһата суох кыргыттар оҥортороллор. Орто сыаната – 30 тыһыынча солкуобай.

Сайыына, 25 саастаах: “Мин төрүөхпүттэн биим суоҕа, хараҕым кыараҕас этэ. Кыра кылаастарга үөрэнэ сылдьаммын наадыйбат этим. Онтон улаатарбар кыбыстар буолбутум. Бэлэм “килиэйдэнэр биилэри” атыылаһан халтаһабар сыбыырым. Устудьуоннуу кэлээт үлэ булунан, харчы мунньунан, баҕалаах халтаһабын “быстарбытым”.

Гель-лаах

– тыҥыраҕы араас дьүһүнүнэн лаах­тааһын, дизайн оҥоруу. Көн­нөрү тыҥырах лаа­ҕыгар тэҥнээтэххэ, геллээх лаах ты­ҥырахха уһаабыта түөрт нэ­диэлэ сылдьыан сөп. Биир судургу дизайны 1 000 солкуобайга оҥороллор.

Анна, 28 саастаах: “Дьону кытта кэпсэтэрбэр, билсэрбэр, бастатан туран, тыҥырахтарын көрөбүн. Хас биирдии бэйэтин убаастанар кэрэ аҥаар тыҥыраҕын көрүнүөхтээх, оҥостуохтаах дии саныыбын. Бэйэм тыҥырахпын тохтоло суох гель-лаахтаппытым үһүс сыла буолла. Сылга биир ый сынньатабын. Саха сиригэр тыҥырах оҥорор кыыс наһаа элбээтэ. Мин куруук биир маастарга сылдьабын”.

Кыламан “үүннэрии”

– кыламан үрдүнэн эбии олордуу кыламаннары килиэйдииллэр. Орто сыаната –
1 500 солкуобай.

Жанна, 25 саастаах: “Кыламаммын тохтоло суох “үүннэрбитим” икки сыл буолла. Кыламана суох бэйэбин сыгынньах кэриэтэ сананабын. Икки чаас кэриҥэ солуоҥҥа килиэйдэтэбин. Сарсыарда сирэйбин сууннум да бэлэм буолабын, өр кырааскаланан бириэмэ бараабаппын”.

Массаас

– сис, сүнньү, атах, уопсай эт-­сиин массааһа арааһыттан сыаната тутулуктанар. Солуоҥҥа биирдэ сылдьыы – 4 500 солкуобайга тэҥнэһэр.

Аина, 35 саастаах: “Ыйга иккитэ эбэһээт спа-солуоҥҥа массааска сылдьабын. Нэдиэлэтээҕи сылааны таһаарарга саамай наадалаах уонна туһалаах процедура дии саныыбын. Массаас кэнниттэн саҥаттан төрөөбүт курдук сананабын, чэпчээбит курдук буолабын”.

Лифтинг

— сирэй мырчыстаҕаһын көннөрүү. Тирии өр эдэр көрүҥнээх сылдьарын ситиһээри, сылга биирдэ-иккитэ анаан аппараатынан оҥортороллор. Сыаната
10 тыһыынча солкуобайтан саҕаланар.

Мария, 32 саастаах: “Сирэйбин маннык процедуранан оҥорторор буолбутум түөрт сыл буолла. Улахан мырчыстаҕастар тахса иликтэринэ көннөттөрөн кэбиһэр ордук эбит. Саха кыргыттарыгар ордук иэдэс суолунан, харах аннынан мырчыстаҕастар тахсаллар быһыылаах”.

Баттах үүннэрии

– кылгас баттахтаах эбэтэр баттахтара бытааннык үүнэр кыргыттарга туһуламмыт ньыма. Маастардар баттахха бэлэм баттах утахтарын көстүбэт гына килиэйдииллэр. Сыаната төһө уһуну оҥортороргуттан тутулуктаах, холобура, 50 см – 12 тыһыынча солкуобай.

Ольга, 34 саастаах: “Урут уһун баттахтаах этим, онтон оҕоломмутум кэнниттэн баттаҕым түһэр буолбута, туруга мөлтөөбүтэ. Онон баттахпын кырыйтарарга күһэллибитим, онтум үүммэтэҕэ. Өр толкуйдаан бараммын бэлэм баттаҕы килиэйдэтэргэ санаммытым. Сыаната ыараханын аанньа, олус чэпчэки ыйааһыннаах, суунарга-тараанарга эрэйдэммэппин”.

Микроблейдинг

– хаас быһыыта сүппэтин туһуттан барбат кы­­раасканан уруһуйдууллар. Бу уруһуй уһаабыта биир сыл сылдьар, сыаната 3 500 солкуобайтан саҕаланар.

Светлана, 29 саастаах: “Сарсыарда аайы үлэбэр бараары туран чаас аҥаарын быһа хаас оҥостор этим. Биирбин уһун суон, оттон иккиспин кылгас синньигэс гына уруһуйдуу-уруһуйдуу төттөрү соторум, бириэмэ бөҕөтүн барыырым. Онтон, хата, хааһым уруһуйа барбат гына микроблейдинг оҥорторбутум сыл аҥаара буолла. Абыранным аҕай”.

Уоһу улаатыннарыы

– уоска гиалуроновай кислотаны укуоллаан “үлүннэрэллэр”. Сыаната 8 000 солкуобайтан саҕаланар.

Алена, 30 саастаах: “Мин уоһум быһыыта сүтэн, дьүһүнэ симэлийэн хаалбыта. Онуоха гиалуроновай кислота укуоллатан төттөрү быһыытын төнүннэрбитим. Улахан уостаныы кэм ирдэбилэ буолбута ыраатта диэххэ сөп”.

Динара Евсикова, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0