Кэпсэтии этническэй туризмы сайыннарыыга туһуланна

Ааптар: 
Бөлөххө киир:

«Орто дойду» туристическай этнокомплексыгар СӨ Уопсастыбаннай палаататын көҕүлээһининэн «Этническэй сыһыаннаһыылар. Этнотуризм» тиэмэҕэ санаа атастаһыыта буолла.

Тэрээһиҥҥэ РФ Уопсастыбаннай палаататын омуктар уонна эрэгийиэннэр икки ардыларынааҕы сыһыаннаһыыларын бөҕөргөтүү хамыыһыйатын бэрэссэдээтэлин солбуйааччы Маргарита Лянге кыттыыны ылла. «Төгүрүк остуол» кыттыылаахтара тэрээһини алгыстан  саҕалаатылар.

Алгысчыт — культурология наукатын кандидата, ХИФУ культурологияҕа  кафедратын доцена Семен Протопопов.

Уопсастыбаннай палаата чилиэннэрэ  ыалдьыкка Саха сиригэр этнотуризмы сайыннарыыга туһуламмыт үлэни билиһиннэрдилэр.
Кэлиҥҥи сылларга, туох кистэлэ кэлиэй, үгүс дьон Таиланд, Турция биэрэктэрин бэйэлэрин төрөөбүт дойдуларынааҕар билэр курдуктар. Кэнники сылларга өрөспүүбүлүкэбит, Арассыыйабыт устун айанныыр буолан, дойдубут ханнык да омук сиринээҕэр кыраһыабайын, күндүтүн сыаналыыр буоллубут. Саха сирэ — туризм сайдыбыт  сирэ. Ол туһунан бүгүн биһиги билиһиннэрээри муһуннубут, — диэн «төгүрүк остуолу» аста СӨ Уопсастыбаннай палаататын салайааччыта Николай  Бугаев. 

РФ Уопсастыбаннай палаататын эппиэттээх үлэһитэ Маргарита Лянге блогер буолан, хас хардыытын барытын видеолаан, тугу гына сылдьарын быһааран биэрэ сылдьар. Кинини СӨ Уопсастыбаннай палаататын чилиэннэрэ алгыстан көрсүбүттэригэр махтанна уонна олус кэрэхсэбиллээх сиэрдээх-туомнаах норуот эбиккит диэн бэлиэтээтэ.

Туризмы сайыннарар дойдуга олорор араас омуктар бэйэ-бэйэлэрин кытта өйдөһөр, эйэлээх эрэ  буоллахтарына, ол сиргэ туристар хото кэлэллэр. Кэлиҥҥи 20-чэ сылга биһиги сүрүннээн национальнай бэлиитикэҕэ болҕомтобутун уурар этибит. Билигин норуоттар култуураларын икки ардыларынааҕы бырайыактар инники күөҥҥэ таҕыстылар. Мин 30 сыл дойдум устун айанныыбын да, билигин да ситэри барытын арыйа иликпин. Санаан көрүҥ, Саха сиригэр кэлээри Москваттан 6 чаас көтөн баран, ханна да атын сиргэ буолбакка, бэйэҥ төрөөбүт Арассыыйаҕар сылдьаҕын! Саха сиригэр алтыс кэлиим да, бу өрөспүүбүлүкэни син биир толору арыйбакка, көрбөккө-истибэккэ барабын. Билбэт киһи Саха сирин -50С кыраадыс тымныы дойду дии саныыр. Оттон сайынын 34 кыраадыс куйааска манна «ыһаарыланан» барыахха сөп диэн ким эмэ толкуйдаабыта буолуо дуо? Биһиги олорор  сирбитин, үөрэнэн хаалбычча, сыаналаабаппыт. Ханна эрэ атын сиргэ уоскулаҥ, сынньалаҥ баарын курдук саныыбыт. Онон уопсастыбанньыктары кытта үлэлиир дьон бастакы сорукпут — төрөөбүт дойдуга убаастабылы иҥэрии, дойдубут кэрэхсэтэр өрүтүн инники күөҥҥэ илдьэ сылдьыы, холобур оҥостуу. Онуоха кэммиэрчэскэйэ суох уопсастыбаннай тэрилтэлэр оруоллара сүҥкэн. Эрэгийэҥҥэ хамсааһыны кинилэр оҥороллор, — диэн санаатын үллэһиннэ Маргарита Лянге.

СӨ Уопсастыбаннай палаататын бэрэссэдээтэлин солбуйааччы, РФ Уопсастыбаннай палаататын чилиэнэ Лена Ефремова  Уопсастыбаннай палаата чилиэннэрэ «Саха сирин тыыннаах нэһилиэстибэтэ» («Живое наследие Якутии»), бырайыактарын холобурдаан, сиһилии кэпсээтэ.

Кини Саха сирин каартатын моһуонугар уопсастыбаннай палаата чилиэннэрэ төрөөбүт улуустарын брендин  уруһуйдаабыттарын көрдөрөн, төгүрүк остуол кыттыылаахтарын соһутта да, кэрэхсэттэ да.

СӨ Уопсастыбаннай палаататын наукаҕа, үөрэхтээһиҥҥэ уонна патриотическай иитиигэ хамыыһыйа бэрэссэдээтэлэ Вера Жерготова Таатта улууһун түмэллэрэ Саха сиригэр этнотуризмы сайыннарыыга, ыччаты төрөөбүт дойдуга бэриниилээх буолалларыгар иитиигэ оруолларын туһунан кэпсээтэ.

М.К.Аммосов аатынан ХИФУ доцена Семен Протопопов өрөспүүбүлүкэ ытык сирдэрин кэпсээн, ыалдьыт интэриэһин тарта.

СӨ Уопсастыбаннай палаататын тыа сирэ сайдыытын, агрокомплекс  уонна бэйэни салайыныы хамыыһыйатын бэрэссэдээтэлэ Сергей Сюльскэй Арктика улуустарыгар этническэй туризм сайдыытын Муома улууһугар холобурдаата.

«Кындыкан» айар түмсүү салайааччыта Маргарита Попова Хоту дойду Арктика  этническэй символлара норуоттары сомоҕолуур күүстээҕин билиһиннэрдэ.

СӨ  Дьахталлар өрөспүүбүлүкэтээҕи сойуустарын салайааччыта, Арассыыйа дьахталларын Бюротун чилиэнэ, Уопсастыбаннай палаата аппараатын салайааччыта Анжелика Андреева РФ Уопсастыбаннай палаататыттан быйылгы сылга үһүс киһи кэлэн барбытын бэлиэтээтэ.

—  Саха сиригэр интэриэс баара көстөр. Онон  тустаах хамыыһыйалар бииргэ алтыһан,  биир эмэ сытыы боппуруоһу көһө сылдьар мунньахха быһаарарбыт буоллар, — диэн этии киллэрбитигэр, Маргарита Лянге «тиэрдиэм» диэн эттэ.

Уопсастыбаннай палаата чилиэнэ Дмитрий Соловьев  Нуучча географическай уопсастыбатын ыытар үлэтин билиһиннэрдэ. Кини чуолаан бу күннэргэ Москваҕа этэҥҥэ үктэммит айанньыт Дугуйдан Винокуровка тэрилтэ айанын устата өйөөбүтүн, ый аайы туттарыгар 70 тыһыынча солкуобайы ыыта олорбутун, бары эрэгийиэннэргэ Нуучча географическай уопсастыбатын салаалара Дугуйданы тэрээһиннээхтик көрсөллөрүн хаччыйбытын иһитиннэрэн, «төгүрүк остуол» кыттыыллаахтарын биһирэбилин ылла.

Ити курдук,  салгыы уопсастыбаннай палаата чилиэнэ  Евдокия  Избекова «Саха» НКИХ үлэтин, урбаанньыттар Валерия Атласова «Атласовтар уһаайбалара» этнографическай комплекс, Марианна Андреева «Орто дойду» экопаарка  үлэлэрин туһунан сырдаттылар.

Төгүрүк остуол кыттыылаахтарын аатыттан уопсастыбаннай палаата промышленноска, предпринимательствоҕа, туризмҥа хамыыһыйатын салайааччытын солбуйааччы Ольга Григорьева Маргарита Лянгеҕа ыраастаныы сиэрин-туомун ыытар тээбирини бэлэх уунна.

Оттон СӨ уопсастыбаннай палаататын салайааччыта Николай  Бугаев уопут атастаһан, ааспыт сыллааҕы үлэ отчуотун туттарда.

Ити курдук, этническэй туризмы сайыннарыы туһунан «төгүрүк остуол» бэрт тэрэһиннээхтик, икки өттүттэн туһалаахтык ааста.

Елена  ПОТОЦКАЯ, «Саха сирэ» хаһыат.

Ааптар хаартыскаҕа түһэриитэ.

+1
0
+1
0
+1
0
+1
0
+1
0
+1
0
+1
0