Биир өрөбүл сарсыарда олус чуумпутук, наҕыллык саҕаламмыта. Мин эрдэ уһуктан, саалаҕа көмпүүтэрим иннигэр олорон, мониторга умса түһэн, нэдиэлэ устата мунньуллубут үлэлэрбин үмүрүтэ сатыы олордум. Дьиэ иһэ уу-чуумпу, ким даҕаны күннээҕи түбүгүнэн аралдьыппат кэмэ.
Онтон соһуччу остуолга сытар суотабай төлөпүөнүм тырылаата. Харахпын экрантан арааран көрбүтүм — билбэт нүөмэрбиттэн кылгас СМС кэлбит. Арыйан аахпытым, маннык диэн суруллубут: «Майонезта, мас арыыта уонна сымыытта атыылас! Бу мин саҥа нүөмэрим».
Толкуйдуу түстүм. Онтон бүтэһик уһугар кэргэним буолуо диэн сабаҕалаатым. Киниттэн ураты ким миэхэ маннык дьаһайан, туох да быһаарыыта суох суруйуой?
Баҕар, сарсыарда эрдэ тахсан баран төлөпүөнүн сүтэрбитэ, эбэтэр сим-каартатын уларыппыта буолуо. Онон, элбэҕи ырыта барбакка, үлэбиттэн арахсан, таҥна охсоот, чугастааҕы маҕаһыыҥҥа таҕыстым. Испииһэккэ туох суруллубутунан, туппутунан дьиэбэр аҕалан холодильникка ууртаалаатым уонна салгыы үлэбэр эмиэ умса түстүм.
Киэһэлик кэргэним үлэтиттэн сылайан-элэйэн киирэн кэллэ. Ааҥҥа киирээт, илиитигэр тутуурдаах суумкатыттан бааҥкалаах майонез, мас арыыта уонна сымыыты таһааран остуолга уурда.
Мин хараҕым муҥунан көрдүм. Оттон кини туох да буолбаҕын курдук, миэхэ туһаайан эттэ:
— Дьэ, хайдах суруйан ыыппыккынан, барытын атыылаһан аҕаллым! — диэтэ уонна дьиктиргээбит харахтарынан эбэн эттэ: — Ол эрээри, ити туох буолан эмискэ саҥа нүөмэрдэнниҥ. Төлөпүөнүн алдьанна дуу?
— Ол аата хайдах?! — диэн мин соһуйан ойон турдум. Холодильниктан бэйэм сарсыарда атыыласпыт аспын таһааран остуолга, кини аҕалбыт бородуукталарыгар кэккэлии ууран көрдөрдүм.
Иккиэн олус сөхпүт, уолуйбут кэриэтэ буолан, били биллибэт нүөмэрбитин булан тута эрийэн, кимҥэ маннык ас-үөл наада буолбутун быһаарсарга сананныбыт.
Төлөпүөн уһуннук тырылаабата, нөҥүө өттүттэн кэргэним ийэтэ, хотунум тута хоруйдаата…
Дьыала бүтэһик уһугар маннык буолан биэрдэ. Эмээхсиҥҥэ биир үлэлиир кэллиэгэлэрэ кыттыһан саҥа суотабай төлөпүөнү атыыласпыттар. Онуоха эмээхсин дьиэтигэр дьыбааҥҥа олорон, саҥа смартфону баһылыыр сыалтан, урукку төлөпүөнүн испииһэгиттэн чугас дьонун, аймахтарын, оҕолорун нүөмэрдэрин саҥа төлөпүөнүгэр суруйан саҕалаабыт.
Ол кэмҥэ кэргэнигэр маҕаһыынтан тугу ыларын сакаастаан, СМС ыытаары сылдьан, сыыһа баттаан, суругун биир киһиэхэ буолбакка, испииһэккэ баар бары дьонугар «рассылкалаан» кэбиспит!
Арай кэлин ол киэһэтин күлэ-үөрэ истибиппит, кэргэним убайын дьиэтигэр, чугас аймахтарбыт, бэл доҕотторбут холодильниктарыгар эмиэ эмискэччи — майонез, мас арыыта уонна сымыыт — бородуукта дэлэйбит.
Аймахтар бары биир суругу тутан, биир санаанан салайтаран маҕаһыыҥҥа сүүрбүттэр эбит. Онтон биһиги дьиэ кэргэҥҥэ ол киэһэттэн ыла араас минньигэс бурдук астаах күннэр үүммүттэрэ….
Сайдам