Сарсыарда 6:47 чаас. Будильнигым 6:30 тыаһаата да, хараҕым сабыылаах сытар. «Өссө биэс мүнүүтэ» диэн сылтах көрдөөн буолбатах – этим-сииним, бүтүн туругум уһуктартан да, саҥа күнү көрсөртөн да букатын аккаастаммыт курдук…
Дьиэм үрдүн одуулаан сытабын. Санаабар, мэйиибэр – бүгүн оҥоһуллуохтаах дьыалалар хара былыт курдук кутуллан киирбиттэр. Социальнай ситимнэргэ, эчи элбэҕин даҕаны, 47 ааҕыллыбатах сурук күүтэр, бээтинсэҕэ бүтүөхтээх отчуот («сэрэдэҕэ чопчу баар буолуо» диэн тылбын биэрбитим), онтон 10:00 чааска онлайн мунньах, 11:30 чааска эмиэ иккис көрсүһүү… Ону таһынан бэҕэһээ түүн үөһэ суруйбут сакаасчыт туох эрэ уларытыытын киллэриэххэ наада үһү. «Срочно» диэннээх. Бу тылтан сүрэҕим өлөхсүйэр. «Арай киһи робот эбитэ буоллар?» диэн санаа күлүм гынан киирэн кэллэ…
Хайыахпыный, ороммуттан турабын. Атахтарым баата курдуктар, истибэттэр. Куукунаҕа киирэн кофе бэлэмниибин. Уу оргуйуор диэри төлөпүөммүн көрөбүн. Телеграмҥа аны 12 саҥа сурук. Биирэ салайааччыбыттан: «Дорообо, бүгүн 14:00 чааска кыбаартал түмүгүн, KPI-гын көрүөххэ». Сүрэҕим «парк» гына түстэ. Кутталтан буолбатах. Туох эрэ бүтэй, ис турукпун баттыыр сылайыыттан.
KPI. Кыбаартал отчуота. Урут бу тыллар инникигэ кынаттыыр, күүс биэрэр курдук этилэр, онтон билигин… Билигин бу тыллар кураанах тыас эрэ курдук иһиллэллэр.
Ваннаҕа киирэн сиэркилэҕэ көрүнэбин. Утары турар киһини билбэппин. Хараҕа кураанах, халтаһата испит, сирэйэ сиэрэй өҥнөммүт, баттаҕа арбайан — киһи да куттанар. Косметика эмиэ туһалаабат — ити барыта сылайыы көстүүтэ. Үөрэ сатыыбын да – утары ыарыылаах дьүһүн ойууланар.
— Барыта үчүгэй, — диэн бэйэбэр сибигинэйэбин. — Арыый уһуннук утуйдуҥ быһыылаах. Кофе истэххинэ билигин ааһыа.
Ааспат. Ый буолла, ааспатаҕа ыраатта. Кофе сыта кытта билигин үөрдүбэт, мээнэ аһыы амтаннаах итии уу курдук.
Үлэбэр робот курдукпун. «Автопилот» эрэсиимҥэ холбонобун. Түргэнник, чопчу хоруй биэрэбин, суруктарбар хайаан да үөрбүт смайлик туруорабын. Ким да уорбалаабатын, ким да «туох буоллуҥ?» диэн ыйыппатын туһугар. Биир идэлээхтэрим чаакка «выгорание — кофе да сэргэхсиппэт буолла» диэн күлүү-оонньуу курдук суруйан тарҕаталлар. Лайк туруорабын. Улаханнык күлэбин. Кылгастык уонна кураанахтык мичээрдээн ылабын. Испэр – хотугу муора мууһун курдук тымныы уонна чуумпу.
Эбиэт. Аһаабаппын. Хоспор иһиттэн хатанан, 12 мүнүүтэҕэ харахпын симэн олоробун. Мэйиибэр биир эрэ санаа эргийэр: «Билигин ытаан бардахпына, тохтооботум буолуо». Кэбис, ытаабаппын. Тоҕо диэтэххэ, икки чааска аны KPI туһунан мунньах. Онон, онто да суох мөлтөөбүт «сирэйбин» алдьатыа суохтаахпын.
Киэһэ дьиэбэр оптуобуһунан айаннаан иһэн, дьон үтүрүһүүтүн ортотугар, эмискэ өйдөөн кэллим: мин тугу эрэ дьиҥнээхтик баҕарбатаҕым ырааппыт эбит. «Балтыбар бэлэх ылыахха наада», «бырайыагы бүтэрэ охсуохха» диэн буолбатах. Тус бэйэм тугу эрэ баҕарбыппын ылыахха-оҥоруохха наада. Кинигэ ааҕыахпын. Киинэ көрүөхпүн. Ханна эрэ барыахпын. Дьиэбэр баар куоскабын имэрийиэхпин. Онтум туох да суох. Ис туругум кураанах иһит курдук. Куттал…
Дьиэбэр киирээт, дьыбааҥҥа таҥастаах охтобун. Төлөпүөнүм дьигис гынна – өссө биир сурук. Ылбаппын. Хараҥа хоско хамсаабакка сытабын. Ол сытан, хараҕым уута сүүрэрин биирдэ өйдөөн кэллим. Һуу-һаа диэн ытааһын буолбатах, уу-чуумпутук, наҕыллык… Бу хомолто буолбатах эбит. Ити – уоскулаҥ. Этим-сииним, дууһам «Бүттэ. Тохтоо» диэтилэр.
Сарсын туох буоларын билбэппин. Баҕар, больничнай ылыам. Баҕар, сайабылыанньа суруйуом. Баҕар, үс күн ороммуттан букатын турбакка утуйуом. Ол эрээри, бүгүн бэйэбэр көҥүл биэрдим – тугу да гыммаппын. Хоруйдаабаппын, суруйбаппын. Сымыйанан үөрбэппин. Бу, баҕар, бүтэһик сыл аҥарын устата бастакы бэйэм туһугар хамсаныым буолуо.
Өскөтүн эн олоххор эмиэ маннык буола турар буоллаҕына, өйдөө – эн мөлтөх буолбатаххын. Эн наһаа өр, күүскэ бэйэҕин харыстаммакка сүүрбүккүн, умса түһэн үлэлээбиккин. Ол иһин этиҥ-сииниҥ «Тохтоо!» диир. Бу мөлтөөһүн бэлиэтэ, сылайыы сибикитэ буолбатах. Ити иһитиннэрии (сигнал). Ону иһит. Бэйэҕиҥ харыстаа!
Сайдам