Дулҕалаах нэһилиэгэ Дьааҥыга эрэ буолбакка, бүтүн Саха сирин үрдүнэн кэрэ сэбэрэлээх кыргыттарынан, иистэнньэҥ дьахталларынан, араас быһый, кыанар, күүстээх уолаттарынан, туруу үлэһит, хоһуун дьоннорунан биллэр.
Манна «Харыал тааһа» диэн бөдөҥ таас сыппыта. Харыал диэн сиргэ, Дулҕалаах бөһүөлэгиттэн балтараа көс тэйиччи, былыр улахан таас күскэллэн сыппыт. Ону биир күүстээх кыыс-дьахтар көтөхпүт, онтон үрэх кытыытыттан биэрэк сыырын үрдүгэр таһааран бырахпыт. Ол бырахпыта син балайда уһуннук сыппыт. «Били… кыахтаах кыыс көтөхпүт тааһа » — диэн отур-ботур кэпсэтэллэрэ.
Ону кэлин бөһүөлэккэ тиэйэн аҕалбыттара. Боһойдуон Дьууруй кэпсииринэн, бастаан сыарҕалаах оҕуһунан аҕалан испиттэр. Сир ортотугар сыарҕалара «хаачыгыр» гынаат, хаҥас ылаҕа тосту ыстаммыт. Ону бөһүөлэктэн тыраактыр аҕалан, тиэрпиттэр. Ыһыахха күрэххэ туттарга диэн аҕалбыттар. ЫйааҺыннаабыттар. Онтулара 184 киилэни тарпыт, ол аата уон биир аҥаар буут эбит.
Дулҕалаахха 1983 сыллаахха сопхуос юбилейнай Ыһыаҕа буолбут. Дьон-сэргэ бөҕө тоҕуоруспут ыһыаҕар, күүстээхтэр күрэхтэһиилэригэр Харыал тааһын көтөхпүттэр. Суордаахтан кэлбит Яшка (Яков Васильев) көтөхпүт. Көрөөччүлэр эдэр, отуччата илик дуолан уолу ситиһиитинэн айхаллаабыттар.
Ол ыһыах иннинээҕи сарсыарда эрдэ, ким эрэ, дьээбэлэнэн, ити улахан тааһы хонууттан аҕалан подиумҥа уурбут этэ. Наҕабыыһын Баһылай этэринэн, ол ыһыах сарсыарда эрдэ, кинини кытта Антыыпабыс Хабырылла диэн саастаах, кырдьаҕастар «бэрт күүстээх эрээри, ситэ биллэрбэт» диэбит киһилэрэ, стадион диэкиттэн сис туттан баран, ааһан иһэн, кэпсэтэн барбыт. Ону НаҕабыыҺын: «Ол тааһы ити Антыыпабыс дьээбэлэнэн көһөрбүт буолуохтаах», — диирэ.
Ыһыахха Суордаах Яшката, Харыал тааһын көтөхпүтүн таһынан, мас тардыһан, кэлин республика абсолютнай чемпиона буолбут Владимир Шарины кыайбыта.
Дьэ, оннук кытаанах дьоннор Дьааҥыга бэртэрин ситэри биллэрбэккэ, муҥурдарын булларбакка олорон ааспыттара.
В. Шарин оччолорго Верхоянскай оройуон киинигэр Баатаҕайга үлэлиирэ. Анаан, Дулҕалаахха ыһыахха күрэхтэһэ кэлбитэ.
«Харыал тааһын» түүн түһүлгэҕэ хаалларбыттара, сарсыарда ким эрэ көтөхпүт, атын сиргэ көһөрбүт үһү «, — диэн дьон кэпсэтэр этилэр. Гаврил Антипович Слепцов диэн, эдэригэр туруору күүстээҕинэн улууска биллэр кырдьаҕаһы «ол тааска санаммыт, сыҕарыппыт» дииллэр этэ. «Кырдьаҕас» да диэтэллэр, ити ыһыах саҕана 60 — чалаах этэ. Суордаах Яшката эмиэ булду өрө туппут, тыа киһитэ этэ. «Бураан» снегоходу соҕотоҕун массыына куусабыгар көтөҕөн ылан уурара диэн кэпсииллэр этэ.
«Харыал тааһын» кэлин Верхоянскай куорат кыраайы үөрэтэр түмэлигэр илдьибиттэрэ. Онно тэлгэһэҕэ сытар.