Кэпэрээссийэ сийиэһин дэлэгээттэрэ Госдуума үлэтигэр кыттыахтара
Москваҕа сэтинньи 16 күнүгэр Арассыыйа тыатын хаһаайыстыбатын кэпэрэтииптэрин алтыс сийиэһэ ыытыллаары турар. Онно Саха Өрөспүүбүлүкэтин аатыттан кыттар дэлэгээттэр сарсын, сэтинньи 14 күнүгэр, көтүөхтэрэ.
Дэлэгээссийэҕэ тыа хаһаайыстыбатын миниистирин солбуйааччы Николай Афанасьев, ТХМ дьоҕус киэптээх хаһаайыстыбаларга уонна тыа хаһаайыстыбатын кэпэрээссийэтигэр салаатын салайааччы Иннокентий Попов, СӨ бааһынай хаһаайыстыбаларын уонна кэпэрэтииптэрин ассоциациятын бэрэсидьиэнэ Александр Артемьев, “СахаАгроПродукт” ӨТХПХБК бырабылыанньатын бэрэссэдээтэлэ Константин Тимофеев, Сунтаартан “Кириэстээх” ТХПК бэрэссэдээтэлэ Владимир Егоров, “Амма” ТХПК бэрэссэдээтэлэ Айысен Черноградскай, Намтан “Эрэл” ТХПК бэрэссэдээтэлэ Ньургун Гуляев уонна өрөспүүбүлүкэ бэрэстэбиитэллээх уорганыттан Ил Түмэн аграрнай кэмитиэтин бэрэссэдээтэлэ Андрей Находкин бааллар.
Кинилэр сарсын тиийээт, Госдуумаҕа парламеҥҥа истиилэргэ сылдьыахтара. Дьокутааттар тыа хаһаайыстыбатын кэпэрээссийэтин сайыннарыыны сокуонунан чиҥэтии боппуруостарын дьүүллэһиэхтэрэ. Биһиги өрөспүүбүлүкэбититтэн Федерация Сэбиэтин чилиэнэ Егор Борисов тыл этиэҕэ. Онтон өйүүнүгэр дэлэгээттэр сийиэс үлэтигэр кыттыахтара. Үгэс курдук, улахан сугулааҥҥа федеральнай уонна эрэгийиэннэрдээҕи ситэриилээх былаас бэрэстэбиитэллэрэ, Госдуума дьокутааттара, Федерация Сэбиэтин чилиэннэрэ уонна баан, лизинг хампаанньаларын салайааччылара кыттыахтара. Сийиэскэ РФ 70-ча субъегыттан 500 киһи кэлэрэ күүтүллэр.
Василий НИКИФОРОВ, «Саха сирэ» хаһыат, edersaas.ru