Ааспыт хонукка сэттэ ойуур баһаарын (уопсай иэнэ 641,2 гект.) Алдан, Кэбээйи, Орто Халыма, Таатта, Томпо, Уус Алдан, Уус Маайа оройуоннарыгар умуллардылар. Бу туһунан суһал ыстаап брифинигэр СӨ Экологияҕа, айылҕаны туһаныыга уонна ойуур хаһаайыстыбатыгар миниистири солбуйааччы – сүрүн лесничэй Андрей Коноплев иһитиннэрдэ.
Салгын аалынан уонна космостан кэтээн көрүүнэн тоҕус ойуур баһаара (уопсай иэнэ 126,6 га) Алдан, Үөһээ Бүлүү, Нерюнгри, Сунтаар, Таатта уонна Уус Алдан улуустарыгар баара булуллубут.
«От ыйын 25 күнүнээҕи туругунан уопсайа 60 ойуур баһаара (уопсай иэнэ 61 896,4 га) уонна икки ландшафтнай баһаар (уопсай иэнэ 775 гектар) баар. Былырыын бу кэмҥэ 1 613 240,5 га иэннээх сиринэн 154 ойуур баһаара бэлиэтэнэн турар«, — диэтэ Андрей Коноплев.
Билиҥҥи туругунан уопсайа 4 682,4 га иэннээх сиринэн тоҕус ойуур баһаарын уонна атын көрүҥнээх сирдэргэ (уопсайа 769 гектар иэннээх сиринэн) биир ландшафтнай баһаары умуллараллар.
«Ойуур баһаарын умулларыыга 578 киһи, 28 тиэхиньикэ үлэлиир. Бүгүн былыттан көрөн Авиалесоохрана «Циклон» Ан-26 зондировщик салгын аала Уус Маайа оройуонугар уонна Хабаровскай кыраайга кыраныысса таһынааҕы сиргэ-уокка үлэлиирэ былааннанар. Ойуур баһаарын умуруорууга хонук устатыгар түөрт салгын аала уонна кэтээн көрүүгэ 14 салгын аала үлэлээтилэр. Нэһилиэнньэлээх пууннарга уонна экэниэмикэ эбийиэктэригэр куттал суоһаабат», — диэн бэлиэтээн эттэ.
Рослесхоз-ИСДМ көрдөрөрүнэн, от ыйын 25 күнүгэр Амма улууһугар уонна Дьокуускай куорат сиригэр-уотугар төрдүс кылаастаах, өрөспүүбүлүкэ атын улуустарыгар үһүс кылаастан үрдүгэ суох баһаар куттала бэлиэтэнэр.
Саха сиригэр эрэгийиэн таһымнаах ыксаллаах быһыы-майгы эрэсиимэ, муниципальнай таһымнаах ыксаллаах быһыы-майгы эрэсиимэ Мииринэйгэ уонна Уус Маайа оройуонугар салҕанар.
Хаартыскаҕа Мария Васильева (СИА) түһэриитэ