Өрөспүүбүлүкэҕэ кэнники хонукка 16 киһи балыыһаҕа киирбит. Ити коронавирустаабыт 425 киһиттэн. Оттон 533 киһи үтүөрбүт. Бу туһунан бүгүҥҥү брифиҥҥэ СӨ Бырабыыталыстыбатын Бэрэссэдээтэлин солбуйааччы, суһал ыстаап салайааччытын солбуйааччы Ольга Балабкина иһитиннэрдэ.
Кэнники хонукка ыалдьыбыт дьонтон Дьокуускайга — 22%, улуустарга — 78% буолара ыйыллар. Бүгүҥҥү күн туругунан ыалдьыбыт дьонтон 10 % стационарга эмтэнэр, тастан эмтэнээччитэ — 89,7%.
Коронавируһунан ыалдьыы намтаабытынан, сарсыҥҥыттан, о.э. кулун тутар 10 күнүттэн, коронавирустаабыттары эмтииргэ куойкалар анал балыыһаларга эрэ хаалалларын туһунан Ольга Балабкина эттэ. Ол курдук, өрөспүүбүлүкэтээҕи килиниичэскэй балыыһаҕа, өрөспүүбүлүкэтээҕи 2 №-дээх балыыһаҕа — мэдиссиинэ суһал көмөтүн оҥорор кииҥҥэ уонна өрөспүүбүлүкэтээҕи 3 №-дээх балыыһаҕа. Маныаха билигин улахан болҕомто коронавирус кэнниттэн дьон доруобуйатын чөлүгэр түһэриигэ, чэбдигирдиигэ уурулларын бэлиэтээтэ. Бу нэдиэлэ бүтүүтүгэр өрөспүүбүлүкэтээҕи 3 №-дээх балыыһаҕа бу боппуруос быһаарыллыаҕын туһунан эттэ.
Өрөспүүбүлүкэ үрдүнэн 600 009 киһи коронавируһу утары бастакы быһыыны ылбыт. 146 332 киһи, ол эбэтэр 61,3 % ревакцинацияламмыт.