Бүгүн, атырдьах ыйын 6 күнүнээҕи туругунан, өрөспүүбүлүкэҕэ уопсайа 298 киһи коронавирустаабыт.
Бу туһунан коронавируһу бохсууга үлэлэһэр өрөспүүбүлүкэтээҕи суһал ыстаап иһитиннэрдэ диэн СИА суруллар. Саамай элбэх ыалдьааччы Дьокуускайга буолара ыйыллар — 236 киһи.
Улуустарга балаһыанньа хайдаҕый? Үөһээ Бүлүүгэ, Мэҥэ Хаҥаласка алталыы киһи ыалдьыбыта бэлиэтэнэр. Ленскэй, Ньурба, Уус Алдан улуустарыгар — биэстии; Мииринэй, Хаҥалас оройуоннарыгар — түөртүү; Бүлүү, Нам, Сунтаар, Чурапчы улуустарыгар — үстүү; Алдаҥҥа, Өймөкөөҥҥө, Тааттаҕа, Томпоҕо — иккилии; Абый, Үөһээ Халыма, Дьааҥы, Нерюнгри, Өлүөхүмэ, Эдьигээн, Уус Маайа оройуоннарыгар биирдии киһи ыалдьыбыта быһаарыллыбыт.
Өрөспүүбүлүкэ лабораторияларыгар кэнники хонукка 3 297 анаалыс, пандемия саҕаланыаҕыттан 2 427 969 тест бэрэбиэркэлэммит.