Бүгүн, алтынньы 15 күнүгэр, СӨ Бырабыыталыстыбатын Бэрэссэдээтэлин солбуйааччы Ольга Балабкина быһа биэриигэ тахсан, коронавирус тарҕаныытын уопсай балаһыанньатын билиһиннэрдэ.
edersaas.ru
Бүгүҥҥү туругунан, өрөспүүбүлүкэ үрдүнэн 130 киһи коронавирус дьаҥар хаптарбыт. Онтон 83 киһи Дьокуускайга ыалдьыбыт.
Маны сэргэ, коронавируһунан ыалдьыы түөртүү-биэстии түбэлтэтэ бары улуустарга тахсыбыт. Икки киһи COVID-19 ыарыыттан тыына быстыбыт.
Сууккаҕа 5204 лабораторнай чинчийии ыытыллыбыт.
Ольга Балабкина: “Эдьигээҥҥэ доруобуйа харыстабылын министиэристибэтин үлэһиттэрэ тиийэн үлэлээтилэр. Ыарыһахтарга көмө оҥоһулунна. Маны сэргэ улуустарга, Дьокуускай куоракка куойкалар эбилиннилэр, колл-киин үлэтэ сааһыланан, быһыы-майгы хонтуруолга тутуллар. СӨ Үлэ министиэристибэтэ иһитиннэрбитинэн, Саха сирин хонтуруолугар баар тэрилтэлэр 50% дистанционнай үлэҕэ көстүлэр», — диэн эттэ.
Ольга Балабкина ыарыы күннэтэ элбээн иһэринэн сибээстээн, бары тэрилтэлэр миэрэлэри ыларга бэлэм олороллор диэн бэлиэтээтэ. Туох баар ирдэбиллэри кытаанахтык тутуһарга ыҥырда. Бэйэ бэйэҕэ харыстабыллаах, эппиэтинэстээх сыһыан ыарыыны кыайарга төһүү буоларын эттэ.
Ирина Ханды, “Саха сирэ” хаһыат, edersaas.ru