Өрөспүүбүлүкэтээҕи “Кэнэҕэски дипломат-2018” XII куонкурус түмүктэннэ. Түмүк тэрээһин уонна кыайыылаахтары наҕараадалааһын “Арассыыйа – мин историям” историческай пааркаҕа буолла.
Быйылгы “Кэнэҕэски дипломат” куонкурус СӨ тас сибээскэ миниистирэ, РФ Эрдэнэт куоракка (Монголия) генеральнай консула А.В.Мигалкин төрөөбүтэ 60 сылыгар ананна. Түмүктүүр тэрээһиҥҥэ А.В. Мигалкин уола — СӨ үөрэҕин уонна наукатын миниистирин солбуйааччы Василий Александрович Мигалкин дьиэ кэргэнин кытта кытынна.
Ону тэҥэ, Арассыыйа Тас дойдуларга министиэристибэтин Дипломатическай академиятын норуоттар икки ардыларынааҕы сыһыаннаһыыларга кафедратын сэбиэдиссэйэ Т.В. Каширина, худуоһунньук-педагогтар Норуоттар икки ардыларынааҕы сойуустарын толорооччу дириэктэрэ, ART TEACHER норуоттар икки ардыларынааҕы үөрэх ситимин сурунаалын кылаабынай эрэдээктэрэ М.К. Астафьева уонна А.М. Горчаков аатынан публичнай дипломатияны өйүүр Фонда бэрэстэбиитэлэ В.Г. Карслиева бочуоттаах ыалдьыттарынан буоллулар.
Икки күннээх сытыы тургутуу кэнниттэн призердар уонна муҥутуур кыайыылаах аата билиннэ. Ол курдук, III истиэпэннээх диплому уонна “Океан” лааҕырга сынньанар путевканы Дьокуускай куорат лиссиэйин 10 кылааһын үөрэнээччитэ Илья Глязнецов уонна Ньурба 1 №-дээх оскуолатын 9-с кылааһын үөрэнээччитэ Лев Неустроев ыллылар.
II истиэпэннээх дипломунан Дьокуускай куорат национальнай гимназиятын 11-с кылааһын үөрэнээччитэ Василий Горохов, Томпо улууһун Ыҥаа оскуолатын 11-с кылааһын үөрэнээччитэ Будимир Захаров наҕараадаланнылар. Василийга Дьокуускай куорат уокуругун дьаһалтатын аатыттан анал бирииһи биэрдилэр. Будимир А.В. Мигалкин аатынан СӨ тас сибээскэ департаменын анал бириэмийэтин тутта.
Оттон I истиэпэннээх диплому уонна СӨ Ил Дарханын истипиэндьийэтин сэртипикээтин Куораттааҕы классическай гимназия (Дьокуускай к.) 9-с кылааһын үөрэнээччитэ Елизавета Никонова уонна Сунтаар улууһун Кириэстээх оскуолатын 11-с кылааһын үөрэнээччитэ Вадим Петров ыллылар.
“Кэнэҕэски дипломат-2018” үөрэнээччилэр өрөспүүбүлүкэтээҕи XII куонкурустарын муҥутуур кыайыылааҕынан ааттанна уонна Арассыыйа Тас дьыалаларга министиэристибэтин Дипломатическай академиятыгар туттарсар сэртипикээт хаһаайынынан Дьокуускай куорат 5-с №-дээх оскуолатын 11-с кылааһын үөрэнээччитэ Кирилл Яшин буолла. Оттон муҥутуур кыайыылааҕы бэлэмнээбит педагог Е.Н. Никонова махтал суругунан бэлиэтэннэ.
СӨ тас сибээскэ департаменын пресс-сулууспата.