Киһи олоҕун устата өрүү махтана, ытыктыы саныыр киһилээх буолар
edersaas.ru
Биhиги дьиэ кэргэҥҥэ оннук киһинэн РФ уонна СӨ доруобуйатын харыстабылын туйгуна, олоҕун оҕо доруобуйатын харыстабылыгар анаабыт быраас Варвара Захарова буолар. Сүүрбэттэн тахса сыллааҕыта күҥҥэ көрбүт тапталлаах кыыспыт улахан ыарыыга ылларбытын билбэккэ, киин куорат 3 №-дээх поликлиникатыгар кыайан быһаартарбакка, кэбиниэттэри кэрийэ сылдьыбыппыт. Эмиэ ыйан ыыппыт уочараттаах быраастарыгар киирээри турдахпытына, биир эмчит утары хааман кэлэн, кыыһым туга ыалдьарын ыйыппыта. Кэпсэтэн билсибиппит, бу поликлиникаҕа УЗИ бырааһынан үлэлиир Варвара Захарова эбит этэ. Кыһалҕабытын болҕомтолоохтук истэн баран, Варвара Афанасьевна тута киниэхэ киирэрбитигэр ыҥырбыта. Сонно диагноз туруора охсон, суһаллык Медицинэ киинигэр ыыппыта. Оҕобун быраас ыйыытынан эпэрээссийэҕэ киллэрбиттэрэ. Кыыһым ый иһинэн этэҥҥэ буолан, оскуолаҕа үөрэҕин салҕаабыта. Балыыһаттан тахсарбытыгар хирург: «Оҕоҕутун хойутаппакка аҕалан, этэҥҥэ буолла…», — диэн эппитэ. Кыыспыт билигин үөрэхтээх, оҕолоох, ыал буолан этэҥҥэ олороруттан олуһун үөрэбит.
Бу күннэргэ бэрт үгүс оҕоҕо сырдыгы, үтүөнү бэлэхтээбит, Үрдүк Айыылартан оҕо-аймаҕы быыһыырга ананан кэлбит, эмчит Варвара Захарова өрөгөйдөөх үбүлүөйүн бэлиэтиир. Биһиги дьиэ кэргэн ыксаллаах түгэммитигэр күн-ый буолбут, дириҥ билиилээх, ыарыһахха үтүө сыһыаннаах бырааска муҥура суох махталбытын тиэрдэбит. Варвара Афанасьевна кэмигэр диагноз туруоран, оҕобутун быыһаабыта. Дьону дьоллуур үрүҥ халааттаах аанньалга санаабыта барыта туолан иһэригэр баҕарабыт.
Екатерина ПОПОВА, Дьокуускай к.
«Саха сирэ хаһыат» хаһыат, edersaas.ru саайтка анаан
Сүрүн хаартыска: интэриниэттэн