Маны аах Үөрэх уонна наука

Кэллиэстэр уонна техникумнар куратордарыгар – 5-тии тыһыынча солкуобай

Кэллиэстэр уонна техникумнар куратордарыгар үөрүүлээх сонуну манна ааҕыҥ.

Бырабыыталыстыба кэллиэстэргэ уонна техникумнарга куратордааһын төлөбүрдэрин тустарынан уурааҕы бигэргэттэ.

Бэрэсидьиэн сорудаҕынан 2021 сыл балаҕан ыйын 1 күнүттэн кэллиэстэргэ уонна техникумнарга үөрэх бөлөхтөрүн куратордара оскуолалар кылаас салайааччыларын курдук ый аайы 5-тии тыһыынча солкуобайы ылыахтара. Бырабыыталыстыба маннык төлөбүрдэри хааччыйыыга биэрии быраабылатын уонна федеральнай үбү тыырыыны бигэргэттэ.

От ыйын 12 күнүнээҕи вице-премьердэри кытта суһал мунньахха Михаил Мишустин тыл эттэ.

“Орто идэтийбит үөрэхтээһин бырагырааматын олоххо киллэрэр судаарыстыбаннай уонна муниципальнай үөрэх тэрилтэлэрин педагог-куратордарыгар бу быһаарыы сыһыаннаах. Эрэгийиэннэргэ төһө үп бу сыалга ыытыллара төһө үөрэх бөлөҕө баарыттан тутулуктаах. Федеральнай бүддьүөттэн куратордарга ыйдааҕы төлөбүрдэргэ сылга 9,6 млрд солкуобай көрүллүөҕэ.

Былырыын балаҕан ыйын 1 күнүттэн Бэрэсидьиэн сорудаҕынан уопсай үөрэхтээһин оскуолаларын кылаас салайааччылара кылааһы салайыы иһин эбии төлөбүрдэри ылбыттара. Бэрэсидьиэн муус устарга Федеральнай Мунньахха Анал этиитигэр маннык төлөбүрдэри кэллиэстэр уонна техникумнар куратордарыгар олохтуохха диэбитэ, — диэтэ Мишустин.

“Орто идэтийбит үөрэхтээһин педагогтара миэхэ суруйаллар, биһигини умуннугут дииллэр. Кырдьык, оннук. Онон олоххо киллэриэххэ”, — диэбитэ судаарыстыба баһылыга.

РФ Бырабыыталыстыбатын саайтыттан

Бэлэмнээтэ Женни Стрюкова

Хаартыска: тустаах саайтан

0
0