Дьокуускайга култуура уонна искусство кэллиэһигэр үҥкүү өрөспүүбүлүкэтээҕи I куонкуруһа буолла. Күөн күрэс саха бастакы балерината Аксения Васильевна Посельская 95 сааһыгар ананна. Сиһилии кэллиэс пресс-сулууспатыттан иһитиннэрдилэр.
Күөн күрэскэ түөрт бөлөҕүнэн барыта 99 үҥкүүһүт өрөспүүбүлүкэ улуустарыттан кэлэн кыттыбыт. Саамай кырачаан күрэстэһээччи сэттэ саастаах, оттон саамай улахан саастаах үҥкүүһүт — 44.
Куонкурус кыайыылаахтарыгар эҕэрдэ
Үҥкүү өрөспүүбүлүкэтээҕи бастакы куонкуруһугар Гран-при аатын Таатта улууһун Ытык Күөл сэлиэнньэтиттэн кэлэн кыттыбыт Сардаана Кононова уонна Саргылана Неморицына ыллылар. Салайааччы – Элеонора Маркова. «Ийэ таптала» үҥкүүнү ийэлээх кыыс толорбуттара улахан кэрэхсэбили ылыан ылла.
1 степеннээх лауреат аатын – «З.Н.Винокуров аатынан Намнааҕы оҕо искусствотын оскуолатын» Партизаннааҕы филиалыттан «Сандаара» үҥкүү кэлэктиибэ ылла. Салайааччы Алексей Дьячковскай;
2 степеннээх лауреатынан Дьокуускайтан «Галатея» үҥкүү тыйаатыра буолла. Салайааччы Ирина Данилова;
3 степеннээх лауреат аатыгар Дьокуускайтан «Антре» оҕолорго уонна улахан дьоҥҥо балет оскуолатын үҥкүүһүттэрэ тигистилэр. Салайааччы Зинаида Попова.
11-14 саастаах үҥкүүһүттэргэ
1 степеннээх лауреат үрдүк аатын Ф.С.Аргунов аатынан оҕо искусствотын оскуолатын үөрэнээччитэ ( Таатта улууһа, Ытык Күөл) Максим Аргунов эрэллээхтик ылла. Салайааччы Элеонора Маркова;
2 степеннээх лауреатынан Мэҥэ Хаҥалас улууһуттан Төхтүрдээҕи оҕо искусствотын оскуолатын үөрэнээччитэ, «Манчаары» үҥкүү кэлэктиибиттэн Алексей Плотников буолан үөрүү-көтүү өрөгөйдөөтө. Салайааччы Татьяна Говорова;
3 степеннээх лауреат аата Юлия Павловаҕа (аҕыйах ахсааннаах төрүт олохтоох хотугу норуоттар тыйаатырдарын иһинэн үлэлиир «Маска» үҥкүү искусствотын устуудьуйата, Дьокуускай). Салайааччы Катерина Захарова туттарылынна.
15-18 саастаахтарга
1 степеннээх лауреат – Дайаана Маркова, («Манчаары» үҥкүү кэлэктиибэ, Төхтүрдээҕи оҕо искусствотын оскуолата, Мэҥэ Хаҥалас). Салайааччы Светлана Маркова;
2 степеннээх лауреат – Айталина Горохова уонна Айсен Кириллин, Үөһээ Бүлүү, Хоро. Салайааччы Татьяна Семенова;
3 степеннээх лауреат – Алека Тимофеева, «Күөрэгэй» ансаамбыл, Мохсоҕоллоох орто оскуолата, Хаҥалас. Салайааччы Василина Игнатьева.
19 уонна онтон үөһээ саастаахтарга
1 степеннээх лауреат – «Сааскылаана» үҥкүү кэлэктиибэ, Үөһээ Бүлүү улууһа, Нам сэлиэнньэтэ. Салайааччы Уйгулаана Павлова;
2 степеннээх лауреат – «Ситим» үҥкүү кэлэктиибэ, Ньурба улууһа, Маалыкай. Салайааччы Туйаара Иванова.
Анал ааттар
Классическай үҥкүүнү бастыҥ толорооччу – Аурелия Харитонова («Талисман» балеттан) буолла. Хатастааҕы оҕо искусствотын оскуолата. Салайааччы Лариса Бурцева;
Народнай үҥкүүнү бастыҥ толорооччу – Дьулустаан Могдоев буолла. «Манчаары» үҥкүү кэлэктиибэ, Төхтүрдээҕи оҕо искусствотын оскуолата, Мэҥэ Хаҥалас. Салайааччы Татьяна Говорова;
Бастыҥ туруоруу – Татьяна Говороваҕа тигистэ. «Манчаары» үҥкүү кэлэктиибин салайааччыта, Мэҥэ Хаҥалас улууһа;
ЯРКПУ бастакы выпускниктарыттан анал бирииһин «Сааскылаана» үҥкүү кэлэктиибэ (Нам, Үөһээ Бүлүү. Салайааччы Уйгулаана Павлова) тутта;
Куонкуруһу тэрийээччилэр анал бириистэрэ «Сааскылаана» оҕо ансаамбылыгар (Үөһээ Бүлүүтээҕи оҕо искусствотын оскуолата. Салайааччы Сардаана Иванова) туттарылынна.
Тэрээһин чэрчитинэн, куонкурус кыттыылаахтарыгар Аксения Посельская туруорбут «Фестивальнай» үҥкүүнү үөрэтиигэ маастар-кылаас бэртээхэйэ ыытылынна. Ону сэргэ, «Любительские хореографические коллективы в современных условиях: проблемы и развитие» төгүрүк остуол ыытылынна. Хас да көлүөнэ, А.В.Посельская үөрэнээччилэриттэн, култуура училищетын үҥкүүгэ отделениетын (1969-1971 сс.) выпускниктарыттан саҕалаан билиҥҥи үҥкүү кэлэктииптэрин салайааччылара кэпсэтиигэ көхтөөх кыттыыны ыллылар. Төгүрүк остуол кыттыылаахтара бу куонкуруһу икки сылга биирдэ оҥорорго быһаардылар.
Күөн күрэс саха үҥкүүтүн култууратын харыстыыр, тарҕатар, оҕолору уонна ыччаты үҥкүү кэрэ эйгэтигэр угуйар, абылыыр, ону сэргэ, үҥкүүнү туруоруу уонна толоруу үөрүйэҕин тарҕатар сыаллаах-соруктаах ыытылынна.