Чурапчыттан төрүттээх Учууталлар учууталлара Анисия Габышева дьиэ кэргэнигэр үөрүүлээх түгэн үүннэ.
edersaas.ru
Анисия Гаврильевнаны кырдьаҕастар күннэринэн Дьокуускайдааҕы мэдиссиинискэй кэллиэс биэлсэр отделениетын преподавателэ Сергей Афанасьевич Григорьев кып-кыһыл тюльпан сибэкки дьөрбөтүн уонна кырдьаҕас киһи маҕаһыыҥҥа сылдьыма диэн ас-үөл нобуорун көтөхпүтүнэн тиийэн кэлэн истиҥник эҕэрдэлээтэ. Ону сэргэ кэллиэс үлэтин-хамнаһын билиһиннэрдэ, итии үүттээх чээй иһэ-иһэ Анисия Гаврильевналыын астына кэпсэттэ.
Манна сыһыаран эттэххэ, мэдиссиинэ кэллиэһин устудьуоннара, кэлэктиибэ Анисия Габышеваны Кырдьаҕастар күннэринэн эҕэрдэлиир буолбута үтүө үгэскэ кубулуйда. Анисия Гаврильевна кинилэри кытары көрсүһүүгэ ааспыт олоҕун, сэрии, Чурапчы көһөрүүтүн сылларын, үөрэппит оҕолорун туһунан бэрт интэриэһинэйдик кэпсиирин устудьуоннар мэлдьи болҕойон истээччилэр. Бу маннык көрсүһүүлэр кырдьаҕас киһиэхэ олус күндү, умнуллубат түгэнинэн буолаллар.
Оттон ытык кырдьаҕас кэллиэс дириэктэригэр Дмитрий Афанасьевич Алексеевка, преподаватель Сергей Григорьевка улахан махталын тириэрдэр уонна үрүҥ халааттаах эдэр ыччакка элбэх билиини, сирдээҕи дьолу баҕарар.
Надежда Егорова, «Саха сирэ», edersaas.ru