Коронавирус дьаҥыттан дьон-сэргэ дьиэҕэ олорорго, ыраахтан үлэлииргэ күһэллибитин да иһин, куйаар ситиминэн ыытыллар тэрээһиннэргэ көхтөөхтүк кыттар.
Дьокуускай куорат уокуруктааҕы норуот айымньытын киинэ , «Арчы дьиэтэ» духуобунай култуура киинэ кэллиэксийэньиэрдэргэ «Ким да умнуллубат, туох да умнуллубат» диэн өрөспүүбүлүкэтээҕи быыстапка-көрүүнү тэрийбиттэр. Манна Уус Алдантан, Горнайтан, Бүлүүттэн, Дьокуускайтан кыттыбыттар.
Бу туһунан биһиэхэ «Арчы дьиэтэ» духуобунай култуура кинин уус -уран салайааччыта Любовь Константинова иһитиннэрдэ.
—Күөн күрэс Улуу Кыайыы 75 сылыгар ананна. Быыстапка-көрүү сааһынан хааччахтаммата. Кыттааччылар кэллиэксийэлэрин хаартыскаҕа түһэрэн, видеоҕа устан, барытын быһааран суруйан, кэпсээн ыыттылар. Түмүгү дьүүллүүр сүбэ таһаарда. Оҕо уонна улахан киһи муспут кэллиэксийэлэрэ тус туһунан сыаналаннылар.
Ол түмүгэр оскуола үөрэнээччилэрин бөлөҕөр I үрдэли Бүлүүттэн кыттыбыт Ян Степанов (Салайааччыта Вероника Пономарева) ылла.
Улахан дьоҥҥо I үрдэлгэ Уус Алдантан Станислав Луковцев таҕыста. II үрдэли эмиэ Уус Алдантан кыттыбыт Елена Тролукова ылла. III үрдэлгэ Бүлүүттэн Мария Максимова таҕыста.
Онтон Горнай улууһун кэллиэксийэньиэрэ Валентина Дьяконова I үктэли, Надежда Петрова (Бүлүү) II үктэли ыллылар.
Кыттааччыларга барыларыгар анал ааттары кытары туоһу суруктар ананнылар. Кыайыылаахтарга добун суруктар уонна кубоктар. Маны барытын дьаҥ-дьаһах аастаҕына тиксэриэхпит, — диэн кэпсээтэ, кыттыбыт дьоҥҥо махтанна.
Кыайыылаах тахсыбыт Станислав Луковцев туһунан кылгастык сырдаттахха, Уус Алдан улууһун «Умсулҕан» кэллиэксийэньиэрдэр түмсүүлэрин 1994 сылтан сатабыллаахтык салайар.
Кини 40-тан тахса сыл устатыгар авиация, комсонавтика тимэтигэр кинигэ, сурунаал, маарка, значок, кэмбиэр, испиискэ ойууларын, хармааҥҥа угуллар халандаардар араастарын мунньар.
Станислав Луковцев хаартыскалара