Өлгөм үүтү, эмис эти ылыыга сүөһү боруодата улахан оруоллаах.
Ол иһин, племенной үлэни тиһигин быспакка ыытар, хаһаайыстыбаларга сүөһү хаанын уларытар, тупсарар ирдэнэр. Тыа хаһаайыстыбатын министиэристибэтэ өрөспүүбүлүкэ таһыттан үрдүк бородууксуйаны биэрэр боруода сүөһүнү аҕалыыга иккис сылын утумнаахтык үлэлиир. Онуоха сүөһү сыанатын 98 %-ын толуйууга субсидия көрүллэр. Бу бырагырааманан өрөспүүбүлүкэ таһыттан 2020 сыллаахтан Ленскэй, Амма, Нам уонна Уус Алдан улуустарын хаһаайыстыбаларыгар 721 племенной сүөһү, тоҕус племенной сылгы итиэннэ Хаҥаластааҕы, Нерюнгритааҕы кыылы иитэр хаһаайыстыбаларга 650 киис аҕалыллыбыта. Сүөһүлэр бастакы кыстыктарын этэҥҥэ аһаран дойдутуйдулар, төрөөн-ууһаан ыата сылдьаллар.
Раиса Сибирякова, «Саха сирэ», edersaas.ru