Уочараттаах брифинг кэмигэр, 2021 сылга үктэнэн баран, бүтэһик сууккаҕа Дьокуускайга элбэх киһи ыалдьыбыта бэлиэтэммитин иһитиннэрдилэр.
edersaas.ru
СӨ Бырабыыталыстыбатын бэрэссэдээтэлин солбуйааччы Ольга Балабкина Саҥа дьыллааҕы сынньалаҥ кэмигэр мэдиссиинэ көмөтүгэр наадыйааччы аҕыйыы сылдьыбытын санатта. “Күн бүгүн ордук элбэх киһи ыалдьыыта, Дьокуускай кэнниттэн Мэҥэ Хаҥалас улууһугар бэлиэтэнэр. Онон Мэҥэ Хаҥалас улууһун олохтоохторо, тустаах улууһунан айанныыр эбэтэр быстах кэмҥэ сылдьар дьон ыарыы түргэнник тарҕаныытын тохтотор инниттэн, бары ирдэбили тутуһаргыт наада”, — диэн өрөспүүбүлүкэ олохтоохторугар туһаайан эттэ.
Бэҕэһээ Ил Дархан Айсен Николаев Саха сиригэр хамсыгынан сибээстээн, хааччахтааһын миэрэтин уһатар туһунан ыйаахха илии баттаабытын санатта. “Тустаах ыйаахха олоҕуран, судаарыстыбаннай соругу толорор култуура тэрилтэлэрэ туох баар ирдэбили тутуһан, саалаларын аҥаарын толорон үлэлииллэрэ көҥүллэнэр. Итини таһынан, нуорманы тутуһан сауналар, баанньыктар үлэлиэхтэрин сөп” – диэн эттэ.
Күн бүгүн, Саха Өрөспүүбүлүкэтигэр хамсыгы утары 5242 вакцинаны аҕалбыттар. Барыта 1801 киһи быһыыны ылбыт. Быһыыны биэрии 8 улууска бара турарын иһитиннэрдэ. Тохсунньу 12 күнүнээҕи туругунан эбии вакцинаны 5 улууска түҥэппиттэр. Быһыыны ылыан баҕалаах дьон олорор сирдэринэн поликлиникаларыттан ыйыталаһыахтарын сөп.
Дьокуускай куоракка – 71
Мэҥэ Хаҥалас улууһугар — 19
Алдан, Мииринэй улуустарыгар – 13-15
Нерюнгри улууһугар – 11
15 улууска – бииртэн түөркэ диэри бэлиэтэнэр.
Суукка устата 2832 анаалыһы оҥорбуттар.
“Саха сирэ” хаһыат, edersaas.ru