Кэлэр ыйга инвестиционнай эйгэ национальнай рейтинин таһаарыахтара
Арассыыйа субъектарыгар инвестиционнай эйгэ төһө табыгастааҕын көрөн, түөрт хайысханан 44 көрүҥҥэ арааран, урбаан бэрэстэбиитэллэрин санааларыгар олохсуйан сыл ахсын национальнай рейтинг оҥороллор. Ол түмүгүн Санкт Петербург куоракка аан дойдутааҕы экэнэмиическэй форумҥа таһаараллар. Биһиги өрөспүүбүлүкэбит 2014 сылтан бу рейтиҥҥэ кыттар. 2017 сыл түмүгүнэн Саха сирэ 85 кыттааччыттан 52 миэстэҕэ тахсыбыта. Бу сотору бэс ыйыгар 2018 сыл түмүктэрин таһаарыахтара.
edersaas.ru
Онон инвестиционнай эйгэни тупсарарга СӨ Урбаан уонна экэниэмикэ министиэристибэтэ күүстэрин түмэн үлэлииллэр. Бастатан туран, орто уонна дьоҕус урбаан үлэлииригэр табыгастаах усулуобуйаны тэрийэллэр. Ол курдук бэйэ дьыалатын саҕалыыр дьоҥҥо үп-харчы өттүнэн өйөбүл оҥоһуллар, маҥнай утаа дьиэ-уот буларга, араас боппуруостары быһаарарга сүбэлээн биэрэллэр.
«Тутуу ыытарга көҥүл ыларга, бас билии докумуонун, кадастровай учуот оҥотторорго дьон күнүн-дьылын бараабатын туһугар административнай хааччах аҕыйаан иһиэ. Ону таһынан, Уһук Илиннээҕи лиизин хампаанньата чэпчэтиилээх сойуом биэрэр, холобур, урбаанньыт оҥорор табаарын солуок ууран туран, саҥа тиэхиньикэ ылыан сөп.
Урбааны сайыннарарга Ил Дархан иһинэн координационнай сүбэ үлэлиир. Инвестиционнай эйгэни сыаналыырга аан бастаан гааска-уокка, инженернэй ситимҥэ холбонуу төһө чугаһын көрөллөр. Экэниэмикэни сайыннарар араас бырайыактары үбүлээһининэн СӨ инвестицияны буларга уонна табаары экспортка таһаарарга үлэлэһэр ааҕыныстыба дьарыктанар”, — диэн СӨ экэниэмикэтин миниистирин солбуйааччы Тимур Ханды билиһиннэрдэ.
Марианна Тыртыкова, «Саха сирэ», edersaas.ru