Дьокуускай куорат баһылыга Евгений Николаевич Григорьевка ыйытыыбын тиэрдибит киһи диэн санаалаах-оноолоох сылдьыбытым. Хата, саайт хаһыат нөҥүө бэриллэр буолан, санаам ситтэ.
Хайдах да балаһыанньа буолтун иһин, куорат ыһыаҕын 2022 сылга хайаан да ыытыахха диэн этиилээхпин. Хамсык хаптайбат да түбэлтэтигэр, хайаан да биир күҥҥэ ыытыллыан наада. Биир эрэ күҥҥэ. Бу Сиргэ биһиги курдук тоҕус ыйы быһа чаҕылхай күнэ суох, муус кыаһааҥҥа олорор омук суоҕа буолуо. Онон айылҕа силигилээн ситиитэ айыыларбытын кытары алтыһар алгыстаах ыһыахпыт ыытылыннаҕына эрэ, дьиҥ сахалыы өйбүт уһуктар, ырааһырар кэммит буоллаҕа. Алгыс аалы көтҕөр диэн мээнэҕэ этиллибэтэҕэ. Сылгы киитинэн түптэ сыта, алгысчыт биир ситимҥэ норуоту тардыыта хайаан да сахаҕа наада. Оччотугар бу хамсыкпыт да төлөрүйүө этэ.
Ыһыах 8 чааска бүттүн, иккис күнүгэр күрэхтэһии көрөөччүтэ да суох ыытылыннын. Кылаабынайа, алгыс уонна оһуохай хайаан да ыытыллыахтаах. Саха киһитэ ыһыахтаабакка саха буолбат. Норуоппут үгэһин тута эрэ сырыттахпытына омук быһыытынан симэлийиэхпит суоҕа. Мин санаабар, Евгений Николаевич, түс-бас салайааччы буоларыҥ быһыытынан ыараҥнатан, анааран баран, ылынаргар ис сүрэхпиттэн баҕарабын.
Марта Николаева,
суруналыыс, оһуохайдьыт.
Марта Николаева бу ыйытыытыгар маннык хоруй кэллэ.
Убаастабыллаах Марта Тимофеевна!
Эһиил, 2022 сылга, бэс ыйын 25 — 26 күннэригэр Туймаада Ыһыаҕа Үс Хатыҥҥа бар дьону түмэн, үгэс быһыытынан ыытыллыаҕа. Ыһыахпыт Саха АССР төрүттэммитэ 100 сылын бэлиэтиир уонна Туймаада Ыһыаҕа Үс Хатыҥҥа тэриллибитэ 25 сылыгар ананар. Билиҥҥи кэмҥэ түһүлгэлэргэ тутуу, саҥардыы үлэтэ бара турар.
Кэлэр сылга уйгуну-быйаҥы, улахан ситиһиилэри, кыайыылары, айылҕабыт тосхойуо, ыраас салгынынан угуттуо, дьаҥ кыйданыа. Айыы дьонун алгыстаах тыла Үөһээ Айыылары кытта биир ситимнээх буоларыгар төһүү буолуо. Үүнүүнү-сайдыыны кэрэһилиир алгыстаах Ыһыах ыытыллыа диэн эрэнэбит.
Марта Тимофеевна, ахсаабат кыһамньыҥ, үтүө баҕа санааҥ иһин, күүс-көмө, бөҕө тирэх буоларгар махтанабыт!
Дьокуускай куорат аҕа баһылыга Евгений Григорьев
Сүрүн хаартыска: culture-yakutia.com ылылынна