Кэлэр сылга ойуур баһаарын умуруорууга бэлэмнэнии үлэлэрэ хайыы-үйэ саҕаланнылар
2022 сылга ойуур баһаардарын умуруорууга бэлэмнэнии үлэтэ саҕаламмытын туһунан бэҕэһээ СӨ Бырабыыталыстыбатын Бэрэссэдээтэлин 1-кы солбуйааччы Дмитрий Садовников суруналыыстарга аналлаах пресс-кэмпириэнсийэҕэ иһитиннэрдэ. Кини ойуур баһаардара нэһилиэнньэлээх пууннарга кутталы үөскэтиэ суохтаахтарыгар уонна турбут уот тута саба баттаныллыахтааҕар ураты болҕомто ууруллуохтааҕын туһунан быһаарда.
«Кэлэр сылга ойуур баһаарын умуруорууга аналлаах бэлэмнэнии үлэтэ саҕаланна. Ил Дархан Айсен Николаев тустаах боппуруоска аналлаах кэккэ мунньахтары ситэриилээх былааһы уонна добровольческай ыстаабы кытта ыытта. Кэккэ сорудахтары биэртэлээбитинэн үлэ ыытыллан эрэр. Ону тэҥэ, мин ойуур баһаарыгар үлэлиэхтээх сулууспалары тэрийиигэ мунньах ыыппытым. Биһиги бу сайын Бэс Күөлүгэр алдьархай тахсыбытын курдугу аны иккистээн таһаарыа суохтаахпыт. Билиҥҥи туругунан, анал тиэхиньикэлэри атыыластыбыт, сороҕо кэлэн иһэр, хаалбыта эһиил сыл саҥатыгар аадырыһын булуоҕа. Итинэн сиэттэрэн, саҥа тиэхиньикэлэр туруохтаах баазаларын бэлэмнээһин ыытыллар», — диэн Дмитрий Дмитриевич быһааран биэрдэ.
Бэрт сотору кэминэн 2022 сылга ойуур баһаардара турар кутталлаах кэмнэргэ тустаах үлэлэр былааннара бигэргэтиллиэҕэ.