Кэлэр сылга Дьокуускай уулуссаларын саҥардан оҥорууга 1,27 миллиард солк. тыырыллыаҕа
Дьокуускай куорат уулуссаларын саҥардан оҥоруу эһиил эмиэ күүскэ ыытыллар буолла.
Ол курдук, кэлэр сылга киин куоракка 34,1 км уһуннаах уулусса саҥардыллан өрөмүөннэниэ. Ити былааны үмүрүтэргэ өрөспүүбүлүкэ бүддьүөтүттэн 1,27 миллиард солк. тыырыллыаҕа.
«Кэлиҥҥи сылларга эрэгийиэннээҕи уонна Дьокуускай куорат иһинээҕи суоллары өрөмүөннээһиҥҥэ киэҥ хабааннаах үлэлэр ыытыллаллар. Кэлэр сылга киин куорат уулуссаларын саҥардыыга уонна өрөмүөннээһиҥҥэ суол пуондатыттан 1,27 миллиард солк. көрүлүннэ. Ааспыт үлэлэргэ куорат олохтоохторо кыттыыны ылбыттара. Онлайн-эрэсиим көмөтүнэн үлэ хайдах-туох ыытылларын көрө олорбуттара. Бэйэлэрин этиилэрин киллэрэллэрэ. Кэлэр өттүгэр бу уопут эмиэ туһаныллыаҕа», — диэн СӨ тырааныспарга миниистирэ Владимир Сивцев быһааран биэрдэ.
Сэтинньи 30 күнүгэр ылыныллыбыт бүддьүөккэ тустаах сыалы үмүрүтүүгэ 2023-2024 сыллаах былаан эмиэ киирбит. Ол быһыытынан ити кэмҥэ барыта 72,2 км уһуннаах уулусса саҥардыллыахтаах.
Кэлэр сыллааҕы былааҥҥа киин куорат Поярков (Дзержинскэй уонна Октябрьскай учаастага), Ильменскэй (Чайковскай уонна Билибин учаастага), Очиченко, Мархинскай (Марха бөһүөлэгэ) уулуссалара уонна Хатаска Ленин уулусса хабыллыбыттар. Маны тэҥэ, Дьокуускай куоракка Можайскай уулуссаны (Пилоттар уонна Строд учаастагар) Мархаҕа диэри түөрт балаһалаах гына саҥардан оҥоруохтара. Бу этиллибит эбийиэктэр былаан быһыытынан 2023 сылга үмүрүтүллүөхтэрэ.
edersaas.ru