Маны аах Нацбырайыактар

Кэлэр сылга үбүлэнэр бырайыактар быһаарылыннылар

Ил Дархан иһинэн үлэлиир Архитектура уонна куорат тутуутун управлениетыгар өрөспүүбүлүкэ сүрүн архитектора Ирина Алексеева салалтатынан «Саха Өрөспүүбүлүкэтин территориятыгар аныгы куорат эйгэтин тэрийии» судаарыстыбаннай бырагырааманы олоххо киллэрэр биэдэмистибэлэр икки ардыларынааҕы хамыыһыйа мунньаҕа буолла.

Хамыыһыйа чилиэннэрэ «Куорат тупсаҕай эйгэтин тэрийии» федеральнай бырайыагынан кэлэр 2022 сылга олоххо киллэриллэр бырайыактары бигэргэттилэр. Федеральнай бүддьүөттэн уопсастыбаннай территориялары тупсарыыга 218,7 мөл., олбуордар территорияларын тупсарыыга 45 мөл. солк. көрүллүбүт. Куонкуруска 19 бырайыак киирбититтэн, 11 бырайыак кыайыылааҕынан тахсыбыт.

Онон 2022 сылга маннык бырайыактарынан үлэ ыытыллыаҕа: Ньурба куоракка Бүлүү өрүс кытыла (30 мөл. солк.), Майаҕа Комсомольскай болуоссат (30 мөл. Солк.); Мииринэйгэ Айхал бөһ. Доруобуйа паарката (20 мөл. солк.), Уус Майа сэл. Албан аат болуоссата (10 мөл. солк.), Сунтаарга киин болуоссат (30 мөл. солк.), Үөһээ Бүлүүгэ Куорамыкы күөл кытыла (35 мөл. солк.), Кэбээйигэ Сынньалаҥ уонна култуура паарката (10 мөл. солк.), Намҥа Аммосов аатынан набережнай, Аппааныга Мавра күөл кытыла (38,7 мөл. солк.), Өлөөҥҥө А.С.Иванов аатынан искибиэр (10 мөл. Солк.), Ленскэй Ньүүйэтигэр искибиэр (10 мөл. солк.).

– Үптэри тыырыы билиҥҥитэ барыллааһын, аны Бырабыыталыстыбаҕа көрүллүөхтэрэ. Сөбүлэһии усулуобуйатынан федерацияттан үбүлэнэргэ муниципалитеттар эбийиэктэри 2021 сыл сэтинньи 1 күнүгэр диэри олоххо киллэрэргэ хантараах түһэрсиэхтээхтэр, – диэтэ Ирина Алексеева.

Санатан суруйдахха, куоластааһын муус устар 26 күнүттэн ыам ыйын 30 күнүгэр диэри 13 улууска ыытыллыбыта. Онлайн-куоластааһыҥҥа өрөспүүбүлүкэ 76190 олохтооҕо кыттыбыта. РФ Тутууга министиэристибэтэ бэрэбиэркэ кэнниттэн, олортон 59009 куолаһы аахпыта. Учуокка тустаах нэһилиэнньэлээх пууҥҥа олорооччулар ылыллыбыттара.

Раиса Сибирякова.

0
0