Кэлэр нэдиэлэттэн Саха сиригэр коронавирус дьаҥын утары быһыыны туруоруохтара
СӨ Ил Дархана Айсен Николаев улуус баһылыктарын кытта мунньахтаата. Манна кини баһылыктар улууска, нэһилиэккэ кэлэр-барар дьону хонтуруолга ылалларыгар уонна ИФА, ИХА анаалыстары туттараллара булгуччулааҕын сорудахтаата.
Тоҕо диэтэххэ, өрөспүүбүлүкэҕэ төһө да ыарахан туруктаах ыалдьааччы ахсаана аччаабытын иһин, билигин да балаһыанньа уустугун ыйда. Билиҥҥи туругунан балыыһаларга 58 % куойка босхоломмутун, 89 киһи реанимацияҕа сытарын, 23 киһи ыарахан туруктаах ИВЛ аппараат нөҥүө тыына сытарын бэлиэтээтэ. Маны сэргэ, сүбэлиир үлэлэр наадалаахтарын ыйда.
Кыһыҥҥы суол туруутун кытта кэлии-барыы элбээтэҕинэ ыарыы салгыы тарҕамматын туһуттан баһылыктар өттүлэриттэн күүстээх үлэ ирдэнэрин эттэ. Айсен Сергеевич сүрүн болҕомтону аптекалары эминэн хааччыйыыга уурда. Ол курдук, билигин да хотугу улуустарга бу ситэри быһаарылла илигин бэлиэтээтэ. Таатта, Сунтаар, Горнай улуустарыгар уон ананар эмтэн биэс эмп көрүҥэ итэҕэһин эттэ.
Маны таһынан, кэлэр нэдиэлэттэн коронавирус дьаҥын утары быһыы бэриллиитэ саҕаланарын, уопсайа өрөспүүбүлүкэҕэ 200 доза кэлэрин иһитиннэрдэ. Итиэннэ Ил Дархан Саҥа дьылга диэри эбии 600 быһыы кэллэҕинэ, кыһыл зонаҕа үлэлиир миэдиктэр ылыахтара диэтэ. Дьоҥҥо-сэргэҕэ маассабай быһыыны биэрии кэлэр сылтан саҕаланыаҕа. Өрөспүүбүлүкэҕэ ОРВИ, кириип дьаҥа тарҕаныыта 10 % үрдээбит. Кирип утары быһыы хампаанньа үлэтин Нам, Ньурба, Мииринэй уонна Сунтаар улуустара ситэ түмүктүү иликтэр.
Ульяна Захарова бэлэмнээтэ.
«Саха сирэ» хаһыат, edersaas.ru