СӨ Доруобуйа харыстабылын миниистирэ Елена Борисова бүгүҥҥү брифинигэр өрөспүүбүлүкэ иһинэн эпидемиологическай быһыыны-майгыны билиһиннэрдэ.
Бүтэһик сууккаҕа Саха сиригэр 91 киһи коронавирус дьаҥынан ыалдьыбытын, лабораторияларга 2846 тиэс оҥоһуллубутун бэлиэтээтэ.
2021 сыл бэс ыйын 17 күнүнээҕи туругунан өрөспүүбүлүкэбитигэр барыта 208109 коронавирус дьаҥын утары вакцина кэлбит. Бастакы быһыыны 187918 киһи, иккис быһыыны 144641 киһи ылбыт. Аҕалыллыбыт вакцина 90%-на туһаныллыбыт. Бу күннэргэ 3300 доза Спутник-V вакцина, аныгыскы нэдиэлэҕэ ЭпиВакКорона вакцина кэлэрэ күүтүллэр.
Доруобуйа харыстабылын миниистирэ дойду үрдүнэн коронавирус дьаҥа үрдүү турарын бэлиэтээтэ. Оҕо сайыҥҥы сынньалаҥын кэмигэр лааҕырдар үлэлэрэ саҕаланарынан сибээстээн оҕолору харыстыыр туһугар, төрөппүттэри, улахан дьону быһыыны ыларга ыҥырда. Ону тэҥэ олоҕурбут ыарыылаах дьон, чуолаан саахар диабеттаахтар, быһыыны ыллахтарына эрэ дьаҥтан көмүскэнэллэрин санатта.
edersaas.ru