Билиҥҥи үйэҕэ оҕо араас хайысхаҕа дьарыктанарыгар, дьоҕурун сайыннарарыгар аналлаах элбэх көмөлтө бырайыак үлэлиир.
WorldSkills хамсааһыҥҥа хас биирдии оскуола бэйэтин үөрэнээччилэрэ кыахтарын, дьоҕурдарын араас хайысхалаах идэҕэ уонна эйгэҕэ боруобаланалларыгар бэлэмниир тэрээһини ыытар. Онон, манна көхтөөхтүк кыттыбыт оҕо оскуолатын бүтэрэн баран, баҕарбыт идэтин дириҥник баһылыыр кыахтанар.
edersaas
Сунтаар оройуонугар быйылгы WorldSkills Juniors Russia-2019 муниципальнай сүүмэрдиир сүһүөҕэ тохсунньу 23-25 күннэригэр тэрилиннэ. Уопсайа 18 үөрэх тэрилтэтиттэн 14 араас хайысхалаах компетенцияҕа 184 оҕо кытынна.
Хас биирдии компетенцияҕа эбии үөрэхтээһин салаатын педагогтара, производственнай үөрэхтээһин маастардара уонна анал куурустар салайааччылара эксперт быһыытынан үлэлээтилэр. Чемпионат сүрүн эксперынан Вадим Ефимов буолла. Кини — профессиональнай сатабыл регионнааҕы чемпионатын тэрийээччитэ, WorldSkills хамсааһын национальнай уонна бүтүн аан дойдутааҕы чемпионатын кыттыылааҕа, WorldSkillsRussia хамсааһын “сварочнай технология” компетенциятын идэтийбит киинин салайааччыта.
Быйылгы WorldSkills Juniors Russia хамсааһын муниципальнай сүһүөҕэр «Мобильнай робототехника» компетенцияҕа 27 оҕо кыттан, саамай элбэх кыттааччылаах буолла. Бу оҕолор сайдыы, кэлэр кэскил идэтин сэҥээрэллэрэ уонна инникитин баһылыан баҕалаахтара көстөр.
“Лабораторнай химическэй анаалыс”, “Прототипирование”, “Мобильнай робототехника”, “Сылгы кылыттан оҥоһуктар”, “Туойунан охсуу дьыалата”, “Тимиргэ хоруобуйа үлэтэ”, “Мас ууһа”, “Муода технологията”, “Графика дизайна”, “Промышленность дизайна”, “Мультимедийнай суруналыыстыка”, “Ювелир дьыалата”, “CAD инженернэй дизайн”, “Коммуникабельность” компетенцияларга (барыта 14) күрэхтэстилэр. Үс күннээх чемпионат түмүгүнэн кыайыылаахтар ааттаннылар.
Сунтаар оройуонугар WorldSkills Juniors Russia-2019 кэрэхсэбиллээхтик уонна толору ис хоһоонноохтук буолан ааста. Бу бырайыак көмөтүнэн оҕо сэргиир, талыан баҕарбыт инники идэтин дириҥник үөрэтэригэр уонна бэйэтин холонон көрөрүгэр бастыҥ уопут буолла.
WorldSkills Juniors Russia-2019 муниципальнай сүһүөҕүн кыайыылаахтара олунньу 18-20 күннэригэр Сунтаар улууһун чиэһин көмүскүү, бэйэлэрин дьоҕурдарын, сатабылларын көрдөрө регионнааҕы чемпионакка күрэхтэһэ барыахтара. Оҕолорго, улууспут инники кэскиллэригэр ситиһиини баҕарыаҕыҥ.
Дьулустаан ЕГОРОВ, “Саха сирэ”, edersaas сайтка анаан