Бэлиитикэ Интэриэһинэй Култуура Сүрүн

“Кэлэр көлүөнэлэр пааркалара” бырайыагы Татарстаҥҥа көрдөрдүлэр



Стратегическай бырайыак быһыытынан Дьокуускайга тутуллар “Кэлэр көлүөнэлэр пааркалара” Татарстаҥҥа уопут атастаһыытыгар анаммыт төгүрүк остуолга көрдөрүлүннэ. Бу төгүрүк остуол “Куоракка табыгастаах эйгэни оҥоруу” эрэгийиэннэр бырайыактарын сайыннарыы ыйытыыларын ырытыы чэрчитинэн ыытылынна. 

Билигин бу бырайыак тутуутунан “Кэлэр көлүөнэлэр” целевой пуонда дьарыктанар. Пуонда салайааччыта Владимир Егоров этэринэн тутуу саҕаланыыта бу сылга былааннаммыт, кини этэринэн “тутуу эйгэтигэр саҥа таһымы олохтуур, уһулуччулаах тутуу буолара күүтүллэр”.

Бу паарка аан дойду үрдүнэн эрдэ тутуллубатах, ирбэт тоҥ үрдүгэр сыл устата үлэлиир бырайыак буолуоҕа. 2,4 гектар иэннээх сиргэ оҕо уонна ыччат кэлимник сайдарыгар, куорат олохтоохторун бары сынньаналларыгар элбэх аналлаах сир тэриллиэҕэ. Манна хамсаныылаах сынньалаҥҥа, араас тэрээһиннэри аһаҕас салгыҥҥа ыытарга элбэх кыах үөскүөҕэ. Үөрэх киинин дьиэтигэр сүрүн болҕомтону элбэх аналлаах буолууга, табыгастаах буолууга, түргэнник уларыта тутуллар эбийиэктэргэ уурулунна. Кини архитектурата, бырайыага уонна дизайна оҕолору уонна ыччаты саҥа санааларга көҕүлүүр, креативнай индустрия уобаластарыгар саҥаттан саҥа өйдөөһүнү үөскэтэр, сүҥкэн ситиһиилэри ситиһэргэ көҕүлүүр буолуоҕа», — диэн кэпсээтэ Владимир Егоров.

Бу бырайыак Саха сирин Ил Дархана Айсен Николаев сорудаҕынан олоххо киллэриллэр буолбута. 2019 сылга эбийиэк территориятын генеральнай былаанын оҥорорго аан дойдутааҕы аһаҕас күрэх түмүгүнэн кыайыылааҕынан «АТРИУМ/Восток+ »  быһаарыллыбыта. Паарка бырайыага архитектура, бырайыактааһын, тутуу салаатыгар кэккэ улахан наҕараадалары ылбыта. Ол иһигэр бу күннэргэ Architectural Review Future Project Awards 2021 аан дойдутааҕы күрэххэ «Общественное и гражданское строительство» номинацияҕа кыайыылааҕынан биллэриллибитэ.

Төгүрүк остуол үлэтигэр Татарстан Өрөспүүбүлүкэтин архитектурнай бырайыактарын департамена, «Татарстан Өрөспүүбүлүкэтин куораттарын сайыннарыы института» пуонда, Казань куорат пааркаларын уонна искибиэрдэрин дириэксийэтэ, Татарстан Өрөспүүбүлүкэтин куораттарын тупсарыы, боппуруостарыгар үлэлиир кэмитиэт бэрэстэбиитэллэрэ кыттыыны ыллылар.

«Саха сирэ» хаһыат, edersaas.ru

Хаартыска sakha.gov.ru

1
0