Бүгүҥҥү турук хайдаҕый? Ханна элбэх киһи ыалдьыбытый?
Бүгүн СӨ Доруобуйа харыстабылын миниистирэ Елена Борисова ковидынан ыалдьыы туругун туһунан кэпсээтэ. Миниистир сүрүн болҕомтону хат дьахталлары харыстааһыҥҥа туһаайда. Кини этэринэн, от ыйыттан оҕо күүтэр дьахталларга “Спутник” быһыыны биэриэхтэрэ. Онуоха РФ доруобуйа харыстабылын миниистирэ Мурашко бу быһыы оҕо күүтэр дьахталларга хайдах сабыдыаллыаҕын чинчийии туһунан этиитигэр олоҕурда.
Миниистир Елена Борисова СӨ Ил Дарханын бары ыйааҕын толорор наадалааҕын уонна булгуччулааҕын бэлиэтээтэ. Онон ковидтан харыстанар миэрэлэри Саха сирин олохтоохторо тутуһалларыгар ыҥырда. Ордук үлэлиир миэстэлэргэ. Уонна быһыыга улахан болҕомто ууруллуохтаах. Кэлэктиибинэн быһыы ыларга дуогабары түһэрсиини эмиэ аҕынна. Араас көрүҥнэринэн быһыы ылыыга суруйтарыахха сөп эбит. «Спутник» уонна «Эпивак» быһыылар туох атыннаахтарыгар тохтууругар, кини бу сүрүннээн мэдиссиинэ тэрилтэлэригэр сыһыаннааҕын бэлиэтээтэ. Тоҕо диэтэххэ, сүрүн ураты бу быһыылары харайыы усулуобуйатынан уонна тиэйэн аҕалыыны кытта араастаһар буолуон сөп.
Онон бу ааспыт сууккаҕа хас киһи ыарахан дьаҥҥа хаптарбытый? 94 түгэн бэлиэтэннэ диэтэ миниистир. Итилэртэн 59 киһи Дьокуускайга ыалдьыбыта биллибит. Ону сэргэ Алдан, Мэҥэ Хаҥалас оройуоннарыгар – алталыы, Аммаҕа, Дьааҥыга, Мииринэйгэ – түөртүү, Бүлүү, Нам, Уус Алдан оройуоннарыгар – үстүү, Үөһээ Бүлүү оройуонугар – икки.
Лабораториялар суукка устата 3035 чинчийиини ыыппыттар.
Бэлэмнээтэ Женни Стрюкова
Хаартыска: интэриниэттэн