Айылҕа харыстабыла Сүрүн

Кэккэ нэһилиэнньэлээх пууннарга уу таһыма түһэ турар

Кэлиҥҥи икки суукка устата Нам уонна Өлүөхүмэ улуустарынан өрүскэ биэс дэлби тэптэриини оҥордулар. Бу Туймаада хочотун нэһилиэнньэлээх пууннарыгар уонна Нам улууһун Үөдэй сэлиэнньэтигэр уу таһымын намтатта. Ити туһунан, брифинг кэмигэр СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников иһитиннэрдэ.

edersaas.ru

Нам улууһугар сүүрүк хоту олус түргэнник уу таһыма тахсыах чинчилэммитэ, онон сибээстээн алларааҥҥы нэһилиэнньэлээх пууннары көмүскүүр суһал миэрэ ылылынна”, — диэн эттэ Садовников.

Кэлэр сууккаҕа Нам улууһугар Арбын нэһилиэнньэлэх пуунунан уу таһыма тахсыа диэн сабаҕалыыллар. Улууска, өрөспүүбүлүкэ ыксаллаах быһыыга-майгыга кэмитиэтиттэн, ЫБММ, эһээччилэртэн, быһааччылартан турар 270-тан тахса киһи суһал бөлөххө киирэн үлэлиир. Барыта 154 тиэхиньикэ уонна 2 көтөр аал сыһыарыллыбыта. СӨ Ил Дархана Айсен Николаев сорудаҕынан, бэрэссэдээтэли бастакы солбуйааччы Дмитрий Садовников бүгүн балаһыанньаны хонтуруоллуур сыаллаах миэстэтигэр тиийиэҕэ.

Дмитрий Садовников Саха сирин олохтоохторун бигэргэтиллибэтэх иһитиннэриини итэҕэйбэттэригэр, официальнай чахчыларга эрэ сигэнэллэригэр ыҥырда.

Граф Биэрэгэр уонна Кыһыл дэриэбинэнэн быһыты кумаҕынан бөҕөргөппүттэр итиэннэ ууну ыытар турбаны саппыттар. Олохтоохтор 2000 кэриҥэ сүөһүнү, сылгыны уу ылбат сиригэр үүрбүттэр.

Уу ылыан сөптөөх зонаҕа, уопсайа, 138 тиэргэн, 98 дьиэ баар, манна 772 киһи олорор. Дьону быстах кэмҥэ түһэрэр пууннар тэриллибиттэр.

 

СӨ Ил Дарханын уонна СӨ Бырабыыталыстыбатын пресс-сулууспата.

 

0
0
Telegram @edersaas20