Кэбээйи нэһилиэгин ойуур баһаара тумнан ааспата. Бу алдьархайдаах айылҕа айманар иэдээнэ дьон доруобуйатын, өйүн-санаатын, уйулҕатын, сэниэтин энчирэтэрин таһынан, биллэн туран, муниципальнай тэриллиилэр хаһаайыстыбаннай уонна ыксалга туттуллар хаһаас оттуктарын имири эстэ.
Баһаар содулугар элбэх тиэхиньикэ тахсан просека оҥоруутугар, булууктааһыҥҥа, дьону-сэргэни баһаары утары охсуһарга таһарыгар, өссө ханан уот сии сытар сирдэрин чинчийэн көрүү үлэлэригэр сүүрдүлэр. Нэһилиэк хаһаас оттуга бүтэр уһукка тиийбитигэр, ыгым күннэр-дьыллар үүммүттэригэр, үтүөнү оҥорор санаалаахтар көстөннөр улахан көмөнү оҥордулар.
Ол курдук, Татьяна Семеновна Варфоломеева бэрэссэдээтэллээх «Алмазкредитсервис» тэрилтэ уу харчынан 109 тыһыынча солкуобайы оттукка диэн анаан ыытан, улахан көмөнү оҥордо. Бу тэрилтэ өрөспүүбүлүкэҕэ араас улуустарынан үлэлии турар филиаллара түмсэннэр итиччэ сууманы түмпүттэр. Итиннэ биһиги нэһилиэккэ үрдүк таһаарыылаахтык үлэлии турар Татьяна Лугинова салайааччылаах бу тэрилтэ филиала улахан оруоллааҕа биллэр.
Маны таһынан, Степан Михайлович Чепалов генеральнай дириэктэрдээх «Туймаада-нефть» тэрилтэ 300 тыһыынча солкуобайы эмиэ оттукка диэн ыытан санаабытын бөҕөргөттө.
Нэһилиэкпит ыарахан күннэригэр көмөлөспүт тэрилтэлэргэ барҕа махтал!
Кэбээйиттэн Татьяна Максимова-Лазарева.