Олунньу саҕаланыыта Кэбээйи улууһун Сангаар бөһүөлэгэ ыччат бырайыагын көмүскээтэ. Тэрээһини Ыччат сылын арыллыытыгар уонна улуус төрүттэммитэ 80 сылыгар анаатылар.
Андрей Тимофеев, Кэбээйи улууһун баһылыгын социальнай боппуруоска солбуйааччы:
— Улууспут 80 сааһыгар сөп түбэһиннэрэн, гранмытын 80 тыһ. солк. оҥордубут. Манна бары нэһилиэктэртэн уонтан тахса үлэ киирдэ. Бырайыактар бары даҕаны үрдүк таһымнаахтар гынан баран, кыайыылаах биир. Быйыл Марина Эверстова салайааччылаах “ДЭНИО” түмсүү бырайыага бастаата.
Марина Эверстова, Сангаар гимназиятын биологияҕа учуутала, “ДЭНИО” түмсүү салайааччыта:
— Биһиги научнай түмсүүбүт 2003 сыллаахтан үлэлиир, билигин барыта 5-11 кылаастартан 83 оҕо сылдьар. Кыайбыт бырайыакпыт аата «Алыһардаах күөлү чөлүгэр түһэрии» диэн. Оскуолаҕа киирэ илик оҕолортон саҕалаан устудьуоннарга тиийэ хабан үлэлиибит. Бырайыак чэрчитинэн нэһилиэк уустара оҕолору талах олоппос, туттар сэбиргэл оҥорорго үөрэтэллэр. Итиэннэ сылга биирдэ айылҕаҕа, күөлбүтүгэр сүгүрүйүү сиэрин-туомун ыытабыт. Бу сири номнуо кырдьаҕастарбыт бэйэлэрин бас билиилэригэр ылбыттара. Былырыын кэнсиэр тэрийэн, 36 тыһ.солк. хомуйан, күөл кытыытыгар сэргэ, аарка оҥорорго көмөлөспүппүт. Сайын күөлгэ тыынан хатааһылыахтара, кыһын хайыһардыахтара, хаҥкылыахтара. Кытылга баар сквергэ кэлэн оҕолуун-уруулуун бука бары сынньаныахха сөп. Күөлбүтүн чөлүгэр түһэрэн, бөҕү-саҕы кутарбытын тохтотон, дуоһуйа сынньанар сир оҥоруохтаахпыт. Алыһардаах күөл бөһүөлэк ортотугар баар. Бу бырайыагы биһиги былырыыҥҥыттан саҕалаатыбыт. 2020 сылга диэри бүтүөхтээх.
Ыччат сылын арыллыытын үөрүүлээх сиэригэр-туомугар Ыччат дьыалаларыгар уонна дьиэ кэргэн бэлиитикэтигэр миниистири солбуйааччы Алексей Щербаков кытынна. Кэбээйи ыччатын кытта көрсөн, министиэристибэ быйылгы былаанын сырдатта.
Чэлгийээнэ БАХСЫРОВА, «Саха сирэ» хаһыат, edersaas.ru
Хаартыскаҕа «ДЭНИО» түмсүү оҕолоро баһылык Игнатий Спиридоновы кытта.