Бу күннэргэ улуус төрүттэммитэ 80 сылынан сибээстээн, Дьокуускайга Кэбээйи улууһун күннэрэ ыытылла тураллар.
edersaas.ru
Кэбээйи улууһун — 80, Тыа хаһаайыстыбатын министиэристибэтин 95 сыллаах үбүлүөйдэринэн сибээстээн, Кэбээйи улууhун дэлэгээссийэтэ Тыа хаһаайыстыбатын миниистирин Петр Алексеевы уонна Арктика госкэмитиэтин бэрэссэдээтэлин Иван Павловы кытта көрүстүлэр. Тэрээһиҥҥэ Кэбээйи улууһун тыатын хаһаайыстыбатын сайдар кэскилигэр туһаайыллыбыт боппуруостары ырыттылар.
Улуустааҕы тыа хаһаайыстыбатын управлениетын салайааччы Василий Бессонов көрсүһүүгэ ханнык хайысхаларга ордук болҕомто ууруллубутун туһунан бу курдук кэпсээтэ:
— Ламыҥха национальнай нэhилиэк салалтата таба иитиитин боппуруоhугар, аракыата аргыһа түhэринэн сибээстээн, табаны күрүөлээн иитиини туруоруста. Маны таһынан, бөрөнү утары үлэни күүhүрдүү уонна табаны иитиини сэбиэскэй кэминэн тэҥнээбэккэ, сонун ураты нормативнай базаны тэрийии боппуруостарын тула кэпсэттибит. Кировскай эбээн национальнай нэһилиэгэр таба иитиитин сөргүтэргэ, улууска ыhыы үлэтин тэтимирдэн сенаж, биир уонна элбэх сыллаах оттору ыhыы, оту уонна сенаhы кэнсиэрбэлиир ньыманы киллэрии туһунан ырыттыбыт.
Мукучу нэhилиэгин «Сайылык» хаhаайыстыбатыгар 120 ыанар ынах турар хотонун тутуу, «Кобяйская рыба» ХЭУо нөҥүө собо эрэ буолбакка сордоҥ, алыhар, сыалыhар курдук балык көрүҥүн астааһыны-таҥастааһыны сөргүтүү, мелиорация үлэтин ыытыы, ходуhалартан ууну түhэрии, талах, дулҕа быhыытын курдук кэскиллээх боппуруостарга тустаах болҕомто эмиэ туһаайылынна.
Ахсынньы 2 күнүгэр Кэбээйи улууһугар бэйэ бородууксуйатын оҥорон таһаарар хаһаайыстыбалар ас-үөл дьаарбаҥкатын тэрийиэхтэрэ.
Елена ПОТОЦКАЯ, «Саха сирэ» хаһыат, edersaas.ru
Сүрүн хаартыска — СИА-ттан.