Маны аах Тыа хаһаайыстыбата

Кэбээйилэр курааннаабыт улуустарга көмөлөһүөхтэрэ

Өҥ сирдээх-уоттаах Кэбээйи улууһа өссө Сэбиэскэй былаас саҕаттан өрөспүүбүлүкэҕэ саппаас от пуондатын хааччыйыыга утумнаахтык үлэлиир.

Быйыл бу улууска от үүнүүтэ хайдаҕын, курааннаабыт улуустартан төһө сайаапка киирэн эрэрин туһунан ыйыталаспыкка, тыа хаһаайыстыбатын улуустааҕы управлениетын начальнига Василий Бессонов быһа сибээскэ маннык кэпсээтэ:

– Биһиги 15 тыһ. т оту оттуур былааннаахпыт. Нэһилиэктэринэн ходуһаларбытын кэрийэн көрөн, хайа сир хайдах үүммүтүн, төһө оту биэриэн сөбүн барыллаатыбыт. Үүнүү орто. Кураанынан сибээстээн, өрөспүүбүлүкэ улуустарыгар уустук быһыы-майгы үөскээбитин билэбит, өйдүүбүт, онон ааспыт сылларга курдук, төһө кыахпыт баарынан көмөлөһө сатыахпыт. Улуустартан сайаапкалар кииртэлээн эрэллэр. Холобур, Мэҥэ Хаҥалас бэрэстэбиитэллэрэ өссө бэс ыйын бүтүүтүгэр билсэ сылдьыбыттара, барыллааһын быһыытынан, 1 000 т оту сакаастыыллар. Бу нэдиэлэҕэ Чурапчы улууһун бэрэстэбиитэллэрэ кэлэн, 1800 туоннаны атыылаһыахпыт диэн дуогабар түһэрсэн бардылар. Ньурбалар эмиэ ыйыталаһаллар.

Бэйэбит суоттуубутунан, саппаас пуондатыгар, ол эбэтэр атыыга анаан 3000 туоннаны оттуохпутун сөп. Итинтэн 2000 туоннаны Сииттэ биригээдэлэрэ хааччыйыахтара. Билиҥҥи туругунан, уон биир мобильнай биригээдэ тэриллиэҕэ, ол эрээри балаһыанньа күн аайы уларыйа турарынан, мобильнай биригээдэ ахсаана мантан элбиэн эмиэ сөп.

Раиса Сибирякова, «Саха сирэ», edersaas.ru

1
0