Кэбээйи нэһилиэгэр норуодунай кэллэктииптэр ааттарын бигэргэтэр көрүү тэрээһинэ буолла.
edersaas.ru
Дьүүллүүр сүбэҕэ норуот айымньытын салаатын сэбиэдиссэйэ, норуот тыйаатырдарын куратордара Алексей Захаров, СӨ норуодунай артыыһа, Арассыыйа уонна СӨ үтүөлээх артыыһа Афанасий Афанасьев, норуот айымньытын салаатын исписэлииһэ, СӨ култууратын туйгуна Анастасия Аммосова, Кэбээйи улууһун култууратын салаатын салаайааччыта Александр Кычкин, улуус култууратын салаатын отделын салайааччыта Анастасия Сивцева үлэлээтилэр.
Бастакынан Тимофей Сметанин аатынан Кэбээйитээҕи норуот тыйаатырын «Атын киһи оҕото» (Т.Е.Сметанин) айымньытынан испэктээги көрүүттэн саҕалаата. Тыйаатыр режиссерынан Дьокуускайдааҕы култуура уонна ускуустуба колледжыгар кэтэхтэн үөрэнэр Антон Петров үлэлиир. Бу испэктээги Т.Е. Сметанин үбүлүөйүн чэрчитинэн туруоран, нэһилиэнньэҕэ көрдөрбүттэрэ. Сүрүн оруолларга Клим Эверстов, Наталья Иванова, Сергей Егоров оонньоотулар.
Маны таһынан Антон Егорович оскуола оҕолорун дьарыктыырын үлэтин кэрчиктэрин дьүүллүр сүбэҕэ көрдөрөн сэҥээриини ылла. Манна Т. Сметанин «Күөрэгэй» айымньытынан остуоруйа туруоруутун үлэтин түгэннэрин көрдөрдүлэр.
Көрүүнү түмүктээтэ Кэбээйитээҕи кэрэ эйгэ «Тэлээрис» үҥкүү норуодунай кэллэктиибин айар түһүлгэтин улахан кэнсиэрэ. Кэнсиэргэ араас сылларга «Тэлээрис» кэллэктиибигэр үҥкүүлээн тэлээрийэ көппүт выпускниктар, билигин С.А.Зверев-Кыыл Уола аатынан үҥкүү уонна балет тыйаатырын артыыһа Дьулустаан Харлампьев, Култуура уонна ускуустуба колледжын устудьуона Евдокия Софронеева кыттан, кэнсиэри өссө тупсаран биэрдилэр.
— Норуодунай кэллэктииптэр сылтан-сыл тупсан, сайдан иһэллэрин бүгүҥҥү күҥҥэ туоһулаатылар, — диэн дьүүллүүр сүбэ чилиэнэ, С.А. Зверев-Кыыл Уола аатынан үҥкүү уонна балет тыйаатырын бэтэрээн артыыһа Афанасий Афанасьев анаан бэлиэтээтэ.
— Икки күннээх үлэ түмүгүнэн кэллэктииптэр бары норуодунай ааты сөптөөхтүк сүгэ сылдьалларын туоһулаабыттарын туһунан дьүүллүүр сүбэ иһитиннэрэн, үөрүүбүт үрдээтэ. Маннык көрүүлэр үс сыл буола буола ыытыллаллар, — диэн «Сайдам» норуот айымньытын киинин дириэктэрэ Наталья Иванова санаатын үллэһиннэ.
«Көрүүлэр сүрүн тэрээһиннэрэ «Сайдам» норуот айымньытын киинигэр буолан ааста. Кэбээйи сирэ-уота, дьоно-сэргэтэ кэлэр ыалдьыты киирэр ааҥҥа көрсөр үтүө үгэстээхтэр. Бу да сырыыга аартык суолга арыылаах алаадьынан, кыынньар кымыһынан айах тутан көрүстүлэр.
«Cаха сирэ» хаһыат, edersaas.ru анаан
Татьяна МАКСИМОВА-ЛАЗАРЕВА,
Кэбээйи улууһа,