“Үс күн устата сири түөрдүбүт (опашка), ол түмүгэр тоҕус килэмиэтир минерализованнай балаһаны оҥордубут. Ону тэҥэ, утары уоту ыыттыбыт”, — диэн Сииттэ сэлиэнньэтигэр баһаары утары балаһыанньа туһунан Якутия 24 ханаалга Иван Левин иһитиннэрбит.
Кэбээйи улууһун баһылыга эппитинэн, баһаар бөһүөлэк илин өттүттэн соҕуруу диэки өттүгэр барыахтаах. Билигин ону маныыллар.
“Дьокуускайтан баһаары умулларыыга 7 киһи бэйэтин баҕатынан көмөҕө кэллэ. Бүгүн эмиэ баһаары утары охсуһааччылары күүтэбит. Өскөтүн тустаах учаастакка баһаар оннун буллаҕына дьону атын баһаардарга ыытыахпыт. Үһүс күнүн ууну кутар бөртөлүөт үлэлиир”, — диэн Иван Левин эбэн эттэ.
Бу күннэргэ Кэбээйи улууһугар эрэгийиэн салайааччыта Айсен Николаев үлэлээбитэ, уоту кытта охсуһууга саҥа соруктары туруорбута. Ол түмүгэр бэҕэһээ, атырдьах ыйын 1 күнүгэр, улууска «Сахатранснефтегаз» вездеходун, тыраахтары уонна уматыгы ыыппыттара.
Хаартыска: СИА