Кэбээйи улууһун Сэбээн Күөл ыстаадаларыгар быйылгы таба ахсаанын ааҕыы түмүктэннэ.
edersaas.ru
Өрүү буоларын курдук, уруккуттан бу хаһаайыстыбаны өрө тута, инники күөҥҥэ таһаара сылдьыбыт таба иитэр 8-с, 9-с нүөмэрдээх ыстаадалар үлэлэрин түмүгүн таһаардылар.
— Сэбээн Күөлгэ 8-с ыстаада 40-ча таба эбиллиилээх, оттон 9-с ыстаадаҕа 150-ча эбиллибит. Тугуту сүүс ийэ табаттан ылыыга 9-с ыстаада өрөспүүбүлүкэҕэ саамай үрдүк көрдөрүүнү ситистэ. 8-с ыстаада бөдөҥ табатын тыыннаахтыы таһааран эмиэ үчүгэй көрдөрүүлэннэ. Мин санаабар, таба үлэтэ ханна да тиий биир үлэ. Туундара буоллун, тыа буоллун. Көнөтүн эттэххэ, бэйэтэ бэйэтигэр уратылаах. Кэнники кэмнэргэ өрүү бөрөҕө түһэрии баар. Аны быйыл сайыммыт, этэргэ дылы, таҥара биэрбит сайына ааста. Күһүҥҥү өттүгэр күлүмэн, ыргакта (таба мурунугар уонна тириитигэр ыһар тигээйи) сыллата аччаан суох буолан эрэр.
«Сэбээн» ГУТ иннин диэки кыра-кыралаан маҥнайгы хардыыны оҥордо. Онно барыта, сүрүннээн эттэххэ, күүс-көмө үлэтин түмүгэ буолар. Таба дьылҕатын быһаарыы бары өттүттэн көмөлөсүһүү диэххэ наада. Холобура, суол сабыллыан иннинэ хаһаайыстыба салалтата лаппа үлэлэһэн көмүсчүттэри кытта кэпсэтэн, өйдөһөн, таһаҕас бөҕө бырахтаран, бородуукта, балаакка таҥаһа, оһох уонна саамай наадалааҕа – таба сиир тууһа кэлэн ити ситиһиилэри аҕалан эрдэҕэ. Аны быйыл улууспут дьэ лаппа үлэлэстэ. Ол курдук аҕа баһылыкпыт Иван Левин ыстаадаларга хаста да сырытта уонна үлэ көнөр суолугар киллэртээтэ. Бу күннэргэ эмиэ улуус уйунан Ан-2 сөмөлүөтү туруорсан, икки ыйдааҕы биэнсийэни, хаһаайыстыба малын-салын уонна Сэбээн Күөллээҕи орто оскуола таһаҕаһын аҕалтаран, дьону сэргэхситтэ. Хаһаайыстыба бу сайыны быһа бөһүөлэк дьонун этинэн хааччыйан дьон махталын ылла. Быйыл, аҕыйах да буоллар, таба этин соҕотуопкалааһына буолла. Ону дьэ эмиэ улуус өҥөтүнэн сүүрбэттэн тахса үлэтэ суох сылдьыбыт дьон үлэ-хамнас бөҕөнү оҥордулар. Үлэһиттэр бары билиҥҥи ирдэбили тутуһан туран, эти кырбастаан, сууйан-тараан астаатылар.
Урукку курдук билигин тоҥ хаһаа ыскылааттан ким да эти, быары ыла сылдьыбат. Барыта лоп бааччы анал сууламмыт хаалаах атыыланар. Дьэ, ити буолар үлэ илэ көстүүтэ. Табаһыттар да санаалара көтөҕүллэн эрэрэ сирэйдэригэр-харахтарыгар көстөр. Сыралаах үлэлэрин түмүгэр бородууксуйа оҥоһуллан тахсыытын көрөн астыналлар. Инникитин өссө үлэбитин күүһүрдэбит диэн хаһаайыстыба салалтатын кытта атах тэпсэн олорон кэпсэттилэр, —— диэн Ламыҥха нэһилиэгиттэн Кэбээйи улууһун «Дабаан» хаһыатыгар уопсастыбаннай кэрэспэдьиэн, биригэдьиир Мииччэ уола Нэгиэ суруйар.
Бу суруйууну бэйэтин инстаграмыгар agrarnaya_yakutia сырдатта.
Елена ПОТОЦКАЯ, «Саха сирэ» хаһыат, edersaas.ru
Хаартыска — agrarnaya_yakutia инстаграмыттан.
+1
+1
+1
+1
+1
+1
+1